Бухорода спиртли ичимлик истеъмол қилган ҳолда автомашина бошқариб, жаримага тортилган фуқаро тўловдан бош тортиб, МИБ ходимларини дўппослади. У бу хатти-ҳаракати учун икки йил муддатга қамаладиган бўлди. Бу ҳақда Жиноят ишлари бўйича Ғиждувон тумани судига таяниб, «Дарё» мухбири хабар бермоқда.
Маълум бўлишича, Ғиждувон туманида яшовчи Ш.Ш. спиртли ичимлик истеъмол қилиб, маст ҳолда автотранспорт воситасини бошқарган. Ва суд қарорига кўра, вақтинча автомашина бошқариш ҳуқуқидан маҳрум қилинган ҳолда 6 миллион 750 минг сўм жаримага тортилган.
Шундан сўнг Ш.Ш. оилавий шароитини сабаб қилиб кўрсатиб, қарор ижросини бажармай келган ва қайта-қайта талаб қилинишига қарамай, жаримани тўлашдан бош тортган. Туман МИБ ходимлари Яшин Холиқов ҳамда Зуҳржон Зайниевлар қарздорнинг яшаш хонадонига бориб, уйидаги мол-мулкини хатлаш учун келганини билдирган. Спиртли ичимлик таъсирида бўлган Ш.Ш. эса МИБ ходимларини уйга киритмасликка ҳаракат қилиб, уларга куч ишлатиб, дарвозадан ташқарига чиқарган. МИБ ходимлари унинг хатти-ҳаракати учун хизмат машинасига миндирмоқчи бўлганида, фуқаро уларга фаол қаршилик кўрсатган. Ва уларни дўппослаб, ножўя сўзлар билан ҳақорат қилган. Зуҳржон Зайниевнинг чап оёқ тиззасига тепиб, ерга йиқитган, Яшин Холиқовнинг жағ қисмига ҳамда қўл билак қисмига бир неча марта мушт тушириб, «сенларга пул бераманми?», дея қўпол сўзлар билан сўкинишда давом этган. Шу пайт айбдорнинг ота-онаси ва яқинлари воқеадан воқиф бўлиб, жанжал содир бўлган жойга тўпланган. Улар жанжал олдини олишга уриниб, ўғилини тартибга чақиришга уринган. Бироқ Ш.Ш. тўхтамаган.
Хизмат вазифасини бажараётган ҳокимият вакилининг қонуний фаолиятига фаол қаршилик кўрсатиб, уларга енгил тан жароҳати етказиб, шаъни ва қадр-қимматини таҳқирлаган Ш.Ш. Жиноят кодекси 140-моддаси 3-қисмининг «а» банди (ҳақорат қилиш) ва 219-моддаси 2-қисми билан (ҳокимият вакилига ёки фуқаровий бурчини бажараётган шахсга қаршилик кўрсатиш)да айбланиб, 2 йил-у 1 ой муддатга озодликдан маҳрум қилинган.
Мавзуга доир: Жиззахда қарздор МИБ ходимининг бошига тош билан урди
Изоҳ (0)