«Аэрофлот» таркибига кирувчи «Россия» авиакомпанияси Москвадан Тошкентга тўғридан-тўғри мунтазам рейсларни йўлга қўяди. Парвозлар 25 июндан бошлаб Шереметьево аэропортидан ҳафтасида тўрт марта амалга оширилади, деб хабар беради авиакомпания матбуот хизмати.
Жадвалга мувофиқ Москва—Тошкент—Москва йўналиши бўйича парвозлар ҳафтанинг сешанба, пайшанба, шанба ва якшанба кунлари амалга оширилади.
Москвадан соат 08:05 да учган самолёт Тошкентга соат 14:10 да келиб қўнади, қайта рейс соат 15:40 да учади ва 17:45 да бориб қўнади — маҳаллий вақтлар бўйича.
«Россия» авиакомпанияси ушбу йўналишда маҳаллий Superjet 100 самолётларидан фойдаланади. Бортдаги умумий ўринлар сони 87 та бўлиб, уларнинг 12 таси — бизнес-класс ва 75 та — эконом-класс.
Июнь бошларида Россия ва Ўзбекистон авиация маъмурияти Москва—Тошкент йўналишида парвозлар частотасини ошириш бўйича келишувга эришганди. Россия ва Ўзбекистон ўртасидаги ҳаво қатновини ривожлантириш мақсадида авиация раҳбариятлари Москва—Тошкент йўналиши бўйича парвозлар частотасини ҳафтасига 25 рейсдан 39 тагача оширишга келишиб олган.
Аввалроқ Uzbekistan Airways Express Тошкентдан Самарага парвозларни йўлга қўймоқчилиги, Uzbekistan Airways Сочига авиақатновларни узайтиргани тўғрисида хабар берилганди.
Изоҳ (0)