Isroilning sobiq bosh vaziri, muxolifatdagi “Likud” partiyasi yetakchisi Benyamin Netanyaxu Knesset (parlament)ning tarqatilishi haqidagi xabarlardan so‘ng, yangi hukumatni shakllantirib, unga rahbarlik qila olishiga ishonch bildirdi. Bu haqda The Times of Israel xabar bardi.
“Safdoshlarim va men keng ko‘lamli milliy hukumat tuzamiz, uni men boshqaraman va ushbu hukumat barcha isroilliklarga istisnosiz g‘amxo‘rlik qiladi”, — dedi Netanyaxu.
Siyosatchining ishontirib aytishicha, agar u bosh vazir lavozimiga qaytsa, uning hukumati “soliqlarni, narxlarni pasaytiradi va Isroilni eng yuqori yutuqlar va qo‘shimcha tinchlik kelishuvlari sari yetaklaydi”.
Netanyaxu Knessetning tarqatilishi kutilayotgani va amaldagi bosh vazir Naftali Bennetning iste’foga chiqishini “millionlab isroilliklar uchun ajoyib yangilik” deb atadi. Amaldagi koalitsiya kelishuviga ko‘ra, Bennet amaldagi tashqi ishlar vaziri Yair Lapidga o‘rnini bo‘shatib beradi.
“Knessetdagi muxolifatning bir yillik shiddatli kurashi va Isroil xalqining og‘ir iztiroblari ortidan Isroil tarixidagi ushbu eng omadsiz hukumat o‘z nihoyasiga yetgani barchaga ayon”, — dedi siyosatchi.
Avvalroq, 20-iyun kuni Bennet va Lapid bir hafta ichida Knessetni tarqatib yuborishga va keyingi saylovlargacha koalitsiya kelishuvi doirasida Vazirlar Mahkamasi rahbarining vazifalarini Tashqi ishlar vazirligi rahbariga o‘tkazishga kelishib olgan edi. “Biz hukumatni saqlab qolish uchun hamma narsani qildik. Parlamentni tarqatib yuborish to‘g‘risidagi qaror Isroil uchun to‘g‘ri qaror”, — dedi Bennet.
Bennetning “Yamina” partiyasi va Lapidning “Yesh Atid” partiyasii boshchiligidagi koalitsiya 2021-yil 23-martda bo‘lib o‘tgan parlament saylovlaridan so‘ng Vazirlar Mahkamasini tuzgan edi. Shundan so‘ng, o‘sha yilning 13-iyunida Bennet so‘nggi 12 yil davomida — 2009 yildan beri bosh vazir bo‘lib kelgan Benyamin Netanyaxuning o‘rnini egalladi. Umumiy hisobda Netanyaxu Vazirlar Mahkamasi rahbari sifatida 15 yil ishlagan — bu mustaqil Isroil tarixidagi rekord davr.
Izoh (0)