“Rossiya G‘arbga ortiq hech qachon ishonmaydi” — Peskov

Rossiya G‘arbga ortiq hech qachon ishonmaydi, dedi Rossiya prezidenti matbuot kotibi Dmitriy Peskov Amerikaning NBC telekanaliga bergan intervyusida.

“Bu uzoq davom etadigan inqiroz bo‘ladi. Biz G‘arbga endi hech qachon ishonmaymiz”, — dedi u.

24-fevral kuni Ukrainada urush boshlanganidan keyin Rossiyaning G‘arb davlatlari bilan munosabatlari keskin yomonlashdi. G‘arb Rossiyaga qarshi uning rahbariyati, banklari va ayrim tarmoqlariga ta’sir ko‘rsatgan bir qancha sanksiyalar paketini kiritdi. Moskva bunga javoban mamlakatga qarshi sanksiyalar joriy qilgan davlatlarni do‘stona bo‘lmagan davlatlar ro‘yxatiga kiritdi. Ularga gaz uchun to‘lovlarni rublda amalga oshirish shart etib qo‘yildi. Rossiya, shuningdek, AQSH, Yevropa Ittifoqi va Buyuk Britaniyaning ba’zi rasmiylari, diplomatlari va ishbilarmonlariga mamlakatga kirishini taqiqladi va boshqa nosimmetrik choralar ko‘rdi.

Rossiya yoki uning rahbariyati bilan eski munosabatlarni tiklashning iloji yo‘qligi haqida G‘arb davlatlarining ayrim siyosatchilari gapirgan. Xususan, Buyuk Britaniya bosh vaziri Boris Jonson, AQSH davlat kotibi Entoni Blinken va Finlyandiya bosh vaziri Sanna Marinlar shunday bayonotlar bilan chiqishgan.

Rossiya tashqi ishlar vaziri Sergey Lavrov, o‘z navbatida, Rossiya G‘arb bilan munosabatlarni qayta tiklash masalasini, hatto G‘arbning o‘zi buni taklif qilgan taqdirda ham jiddiy o‘ylab ko‘rishini aytdi. Federatsiya Kengashi spikeri Valentina Matviyenko “Yevropaga oyna” ochmaslikka chaqirdi va bu foydali bo‘lsa-da, ammo hozircha “Rossiyaga bunday G‘arb bilan aloqalar kerak emas”ligini aytdi.