Moliya vazirligi huzuridan budjetdan tashqari Pensiya jamg‘armasi O‘zbekiston prezidentining “Ikkinchi jahon urushi qatnashchilari va faxriylarining moddiy ta’minotini yaxshilash hamda yolg‘iz keksalar va nogironligi bo‘lgan shaxslarni qo‘llab-quvvatlash tizimini yanada takomillashtirish to‘g‘risida” qarori yuzasidan “Daryo”ga tushuntirish berdi.
Kimlarga har oyda 300 ming so‘mdan beriladi?
Ijtimoiy himoyaga muhtoj aholi qatlamini davlat tomonidan himoyasini yanada mustahkamlash, ayniqsa, keksa yoshdagi avlod vakillari, nogironligi bo‘lgan shaxslar, shuningdek 1941—1945-yillarda urush faxriylari bo‘lgan fuqarolarning ijtimoiy himoyasini yanada kuchaytirish maqsadida O‘zbekiston prezidentining qarori qabul qilindi. Qaror bilan ushbu toifaga kiruvchi 4 ming 400 nafarga yaqin fuqarolarga qo‘shimcha 300 ming so‘m (bazaviy hisoblash miqdorining bir baravarida) hamda yiliga bir marta kompensatsiya pul to‘lovlari – 4 million 500 ming so‘m (bazaviy hisoblash miqdorining 15 baravari) miqdorda to‘lanishi belgilab o‘tildi. Kompensatsiya puli har yili avgust oyida pensiya tayinlash vakolati yuklatilgan tashkilot tomonidan to‘lab beriladi.
Avvallari yuqoridagi toifaga kiruvchi shaxslarga har oy 15 turdagi oziq-ovqat mahsulotlari hamda gigiyena mahsulotlari yetkazib berilar edi. Har oylik oziq-ovqat mahsulotlari hamda gigiyena tovarlari mahsulotlarining miqdori o‘rtacha 250 ming so‘m etib belgilangandi. Endilikda qo‘shimcha to‘lov bepul yetkazib beriladigan oziq-ovqat mahsulotlari hamda gigiyena tovarlari mahsulotlari o‘rniga har oyda berib boriladi.
Ushbu toifaga kirgan fuqarolarning o‘zgalar parvarishiga muhtojligi tibbiy ijtimoiy ekspert komissiyalari tomonidan aniqlanadi. Pensiya tayinlash vakolati yuklatilgan tashkilotga fuqaroning o‘zgalar parvarishiga muhtojligi to‘g‘risidagi ma’lumotlar yetkaziladi.
Nogironligi ham qo‘shimcha to‘lov to‘lanadimi?
Qaror bilan o‘zgalar parvarishiga muhtoj bo‘lgan keksa yoshdagi shaxslar hamda nogironligi bo‘lgan shaxslarga ushbu qo‘shimcha to‘lovlar har oyda to‘lanishi belgilab o‘tilgan. O‘zgalar parvarishiga muhtojlik faktini tibbiy ijtimoiy ekspert komissiyalari belgilab beradi. Pensiya tayinlovchi organga axborot tizimlari orqali yoki boshqa yo‘nalishlar orqali pensiya tayinlovchi organga yetkazib beradi. Pensiya tayinlovchi organ qarorda belgilangan muddatlarda, tartiblarda hamda miqdorlarda ushbu fuqarolarga qo‘shimcha to‘lovni to‘lab beradi.
To‘lovlar fuqarolarning xohishiga ko‘ra naqd pul yoki naqd pulsiz ixtiyoriy ravishda amalga oshiriladi. Pensiya, nafaqa to‘lovini yetkazib berish vazifasi yuklatilgan tashkilot tomonidan “Xalq banki” yoki boshqa tijorat banklari tomonidan naqd pul ko‘rinishida yoki naqd pulsiz ko‘rinishida yetkazib berilishi mumkin.
Agarda pensiya va nafaqa oluvchi to‘lov kuniga qadar vafot etsa, u bilan birga yashagan oila a’zolariga to‘lab beriladi. Bunda hisoblab chiqarib qo‘yilgan va olinmay qolgan pensiya yoki nafaqani olishlari mumkin.
To‘lovlarni olishda fuqarolarga har xil byurokratik to‘siqlar yoki korrupsion faktorlar yoki boshqa holatlar aniqlanadigan bo‘lsa yoki qo‘shimcha to‘lovlar bo‘yicha savollar bo‘lsa, jamg‘armaning doimiy ishlab turadigan 1140 qisqa raqamiga murojaat qilishlari mumkin.
Davron Fozilov, Moliya vazirligi huzuridan budjetdan tashqari Pensiya jamg‘armasi mas’ul xodimi
Izoh (0)