Shavkat Mirziyoyev Konstitutsiyaga kiritiladigan o‘zgartirishlarni referendum orqali qabul qilishni taklif qildi

Shavkat Mirziyoyev Konstitutsiyaviy komissiya a’zolari bilan o‘tkazilayotgan uchrashuvda Konstitutsion o‘zgarishlar bo‘yicha referendum o‘tkazishni taklif qildi.

“Albatta, xalqimizdan Komissiyaga kelib tushgan barcha muhim va dolzarb takliflarni bugun Sizlar bilan batafsil muhokama qilish imkoniyatiga ega emasmiz. Men ularning ayrimlariga to‘xtalib o‘tdim, xolos. Komissiya taklifi asosida Parlament tomonidan ishlab chiqilgan loyihani umumxalq muhokamasida ko‘rib chiqishni hamda referendum o‘tkazish yo‘li bilan qabul qilishni taklif etaman.

To‘g‘ri, amaldagi qonunchiligimizga ko‘ra, parlamentning o‘zi ham Konstitutsiyaga o‘zgartish kiritish vakolatiga ega. Lekin konstitutsiyaviy islohotni fuqarolarimiz fikri va qo‘llab-quvvatlashi asosida referendum orqali amalga oshirsak, bu tom ma’noda xalqimiz xohish-irodasining ifodasi – haqiqiy xalq Konstitutsiyasi bo‘ladi, deb o‘ylayman, — degan prezident.

Uning ta’kidlashicha, bu “Konstitutsiyaning yagona manbai va muallifi xalqdir” degan tamoyilga to‘la mos keladi.

“Shunda har bir vatandoshimiz ‘Yangi O‘zbekiston Konstitutsiyasi — mening Konstitutsiyam’ deb yuksak g‘urur bilan ayta oladi”, — deb qayd etgan davlat rahbari.

Prezident barcha fuqarolarni Konstitutsiyaga kiritish taklif etilayotgan yangi norma va qoidalarga xolis va haqqoniy munosabat bildirishga chaqirdi.