Ташқи меҳнат миграцияси агентлиги Ўзбекистон бош консулхонаси кўмагида Германиянинг HS-Personal компанияси билан мамлакат фуқароларига немис тилини ўргатиш, кейинчалик уларни немис компанияларига ишга жойлаштириш бўйича келишувга эришди, деб хабар беради «Дунё» агентлиги.
Бош консулхонанинг маълум қилишича, сўнгги йилларда хорижда меҳнат қилаётган фуқароларга муносабат тубдан ўзгарган, меҳнат муҳожирлари билан мулоқот йўлга қўйилган, уларнинг муаммоларини ўрганиш ва ҳал этишнинг янги тизими жорий этилган. Ташқи меҳнат миграцияси жараёнларини тартибга солиш бўйича Германия компаниялари билан Ўзбекистон фуқароларини ушбу мамлакатда меҳнат фаолиятини ташкил этиш учун шартномалар тузиш ва қулай шарт-шароитлар яратиш бўйича тизимли ишлар амалга оширилмоқда.
Амалга оширилаётган ишлар доирасида дипломатик миссия кўмагида Германиянинг HS-Personal компанияси делегацияси Ўзбекистонга ташриф буюриб, Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлигида музокаралар ўтказган.
Натижада немис тилини ўргатиш ва B1 сертификатини олганларидан сўнг, оғир автомашиналар ва йўловчи автобуслари ҳайдовчилигига, қариялар уйларига тиббиёт ходими сифатида, Германиядаги кўнгилочар боғлар, меҳмонхоналар ва ресторанларга ишга жойлаштириш бўйича келишувга эришилган.
Делегация раҳбари Леандер Хьюттенинг сўзларига кўра, Германия томони, шунингдек, Тошкентда нафақат меҳнат мигрантлари, балки тил ўрганиш истагида бўлган барча учун бошланғич А1 дан профессионал C1 даражасида немис тилини ўргатувчи марказни очмоқда. Марказ имтиҳонларни қабул қилади ва Европа Иттифоқи стандартларида жавоб беради Telc сертификатларини беради.
Аввалроқ Ўзбекистондан Канадага мавсумий ишчиларни юбориш йўлга қўйилиши мумкинлиги тўғрисида хабар берилганди.
Изоҳ (0)