15—16-iyun kunlari AQSH Markaziy qo‘mondonligi qo‘mondoni general Maykl Kurilla Tojikistonga tashrif buyurdi.
Tashrif chog‘ida amerikalik general Tojikiston prezidenti, mudofaa vaziri, Qurolli kuchlar bosh shtabi boshlig‘i, Milliy xavfsizlik davlat qo‘mitasi raisi o‘rinbosari bilan uchrashib, chegaralar xavfsizligini mustahkamlash, mintaqaviy tahdidlarni bartaraf etish va Tojikiston qurolli kuchlarini qo‘llab-quvvatlash bo‘yicha birgalikdagi sa’y-harakatlarni muhokama qildi.
Shuningdek, u jurnalistlar bilan uchrashmadi, ammo OAV vakillarining yozma savollariga javob berdi.
Xususan, Maykl Kurilla Asia-Plus nashrining “Tojikiston hukumati o‘tgan yilning avgust oyida chegarani kesib o‘tgan afg‘on vertolyotlarini AQSH hukumatiga topshirish niyatidami? Shunday bo‘lsa, qachon? Ularning soni nechta? Bu qanday sharoitda sodir bo‘ladi?” savoliga javob bergan.
“Biz o‘tgan yilning avgust oyida chegarani kesib o‘tgan Afg‘oniston harbiy-havo kuchlari samolyotlari xavfsizligini ta’minlagani uchun Tojikiston Respublikasi Qurolli kuchlaridan minnatdormiz. ‘Tolibon’ bir necha bor tahdid qilib, bu borada o‘z talablarini ilgari surganiga qaramay, samolyotlar qaytarilmaydi, chunki bu uchoqlar ularga tegishli emas.
AQSH Tojikiston hukumati bilan samolyotlardan samarali foydalanish va ularga texnik xizmat ko‘rsatishning eng yaxshi yo‘lini aniqlash ustida ishlamoqda.
Umid qilamizki, samolyotlarning bir qismi yoki barchasini Tojikiston hukumatiga topshira olamiz. Men bu qachon sodir bo‘lishini hozir aniq ayta olmayman, lekin biz ushbu muammoni hal qilish uchun barcha sa’y-harakatlarimizni amalga oshiramiz”.
Eslatib o‘tamiz, Maykl Kurilla boshliq delegatsiya 13-iyun kuni O‘zbekistonga ham tashrif buyurgan hamda prezident va mudofaa vaziri bilan uchrashuv o‘tkazgan edi.
Izoh (0)