15—16 июнь кунлари АҚШ Марказий қўмондонлиги қўмондони генерал Майкл Курилла Тожикистонга ташриф буюрди.
Ташриф чоғида америкалик генерал Тожикистон президенти, мудофаа вазири, Қуролли кучлар бош штаби бошлиғи, Миллий хавфсизлик давлат қўмитаси раиси ўринбосари билан учрашиб, чегаралар хавфсизлигини мустаҳкамлаш, минтақавий таҳдидларни бартараф этиш ва Тожикистон қуролли кучларини қўллаб-қувватлаш бўйича биргаликдаги саъй-ҳаракатларни муҳокама қилди.
Шунингдек, у журналистлар билан учрашмади, аммо ОАВ вакилларининг ёзма саволларига жавоб берди.
Хусусан, Майкл Курилла Asia-Plus нашрининг «Тожикистон ҳукумати ўтган йилнинг август ойида чегарани кесиб ўтган афғон вертолётларини АҚШ ҳукуматига топшириш ниятидами? Шундай бўлса, қачон? Уларнинг сони нечта? Бу қандай шароитда содир бўлади?» саволига жавоб берган.
«Биз ўтган йилнинг август ойида чегарани кесиб ўтган Афғонистон ҳарбий-ҳаво кучлари самолётлари хавфсизлигини таъминлагани учун Тожикистон Республикаси Қуролли кучларидан миннатдормиз. ‘Толибон’ бир неча бор таҳдид қилиб, бу борада ўз талабларини илгари сурганига қарамай, самолётлар қайтарилмайди, чунки бу учоқлар уларга тегишли эмас.
АҚШ Тожикистон ҳукумати билан самолётлардан самарали фойдаланиш ва уларга техник хизмат кўрсатишнинг энг яхши йўлини аниқлаш устида ишламоқда.
Умид қиламизки, самолётларнинг бир қисми ёки барчасини Тожикистон ҳукуматига топшира оламиз. Мен бу қачон содир бўлишини ҳозир аниқ айта олмайман, лекин биз ушбу муаммони ҳал қилиш учун барча саъй-ҳаракатларимизни амалга оширамиз».
Эслатиб ўтамиз, Майкл Курилла бошлиқ делегация 13 июнь куни Ўзбекистонга ҳам ташриф буюрган ҳамда президент ва мудофаа вазири билан учрашув ўтказган эди.
Изоҳ (0)