Наманган халқаро аэропортидан Фарғона водийси зиёратчиларининг илк гуруҳи Ҳаж сафарига жўнаб кетди. Бу ҳақда «Дарё» мухбири Азизбек Абдувалиев хабар бермоқда.
Наманган вилояти вакилларидан иборат гуруҳ 18 июнь куни тунда махсус ажратилган автобусларда аэропорт ҳудудига кириб келди.
Шу пайтнинг ўзида зиёратчиларнинг юклари ортилган юк машиналари ҳам қўналғага етиб келди. Зиёратчиларни аэропорт ходимлари ва мутасаддилар кутиб олиб, ичкарига киришларига кўмаклашишди.
Зиёратчиларга муфтий Нуриддин Холиқназаровнинг «Ҳаж буюк ибодатдир» номли китоби тарқатилди. Ҳаж давомида бажариладиган амаллар, риоя этиш зарур бўлган қоидалар яна бир бор тушунтирилди.
Аёл зиёратчиларнинг рўмолларида мамлакат байроғи акс этган лента ва гулни эслатувчи шокилаларни кўриш мумкин эди. Улар буни Ўзбекистон, хусусан, гуллар юрти бўлган Намангандан эканликларини эслатиб турувчи рамзлар эканлигини изоҳлашди.
То парвоз вақти келгунича зиёратчиларга егуликлар, ширинликлар ва ичимликлар тақдим этилди. ОАВ вакиллари улардан бафуржа интервьюлар олишга ҳам улгурди.
19 июнь куни саҳар соат 3.55 да Uzbekistan Airways авиакомпаниясининг Boeing 767 русумли ҳаво кемаси бортида 245 нафар йўловчи билан Саудия Арабистонининг Мадина шаҳрига йўл олди.
Бугун кечки пайт Наманган халқаро аэропортидан фарғоналик, эртага, 20 июнь куни эса андижонлик зиёратчилар муборак Ҳаж сафарига йўл олиши кўзда тутилган.
Изоҳ (0)