O‘zbekiston neft-kimyo sanoati tarixida sintetik neftning birinchi partiyasi ishlab chiqarildi

“O‘zbekneftgaz” boshqaruvi raisi Mehriddin Abdullayev ishlab chiqarish jarayonlari va yakuniy mahsulot ishlab chiqarishni boshlash uchun tayyorgarlik jarayonini o‘rganish maqsadida Uzbekistan GTL” zavodida bo‘ldi.

Qayd etilishicha, tashrif davomida GTL zavodning asosiy ishlab chiqarish qurilmalarining boshqaruv markazidagi ishchi holati bilan yaqindan tanishilgan. Hozirgi kunda ishchi holatdagi qurilmalardagi ko‘rsatkichlar yuzasidan atroflicha ma’lumotlar berib o‘tilgan.

Shundang so‘ng “O‘zbekneftgaz” boshqaruvi raisi boshchiligidagi ishchi guruh GTL zavodining asosiy qurilmalari hisoblanadigan Fisher-Tropsh reaktorlarining ishchi holatini o‘rgangan va ushbu reaktorda hosil bo‘layotgan sintetik neftning namunalari olingan. Mehriddin Abdullayev zavodning markaziy laboratoriyasida ishlab chiqarilayotgan sintetik neftni laboratoriya tadqiqotlari natijalari bilan tanishgan.

Ta’kidlanishicha, Uzbekistan GTL zavodida O‘zbekistonning neft-kimyo sanoati tarixida sintetik neftning birinchi partiyasi ishlab chiqarilgani rasman qayd etilgan. Hosil bo‘lgan sintetik neft GTL zavodida sintetik dizel, aviakerosin, nafta va suyultirilgan gazni ishlab chiqarish uchun asosiy xomashyo hisoblanadi.

Hozirda sintetik neft oraliq mahsulotni saqlash rezervuariga yuborilmoqda.

Eslatib o‘tamiz, Qashqadaryo viloyatida 25-dekabr kuni sintetik suyuq yonilg‘i ishlab chiqarish bo‘yicha Uzbekistan GTL zavodining ochilish marosimi bo‘lib o‘tgan. Marosimda Shavkat Mirziyoyev ham ishtirok etgan va nutq so‘zlagan. Davlat rahbari Umarosimioldi taqdimotida O‘zbekistonning yerosti boyliklari xalqniki ekani va shunday bo‘lib qolishi kerakligi haqida gapirib o‘tgan. “Endi gazimizni arzon-garovga chetga sotmasdan, o‘zimiz qayta ishlaymiz va ko‘proq daromad olamiz. Mana, paxta bo‘yicha xuddi shu tizimni yo‘lga qo‘ya oldik-ku, gazda ham shunaqa qilamiz”, — degan u.

Uzbekistan GTL majmuasida yiliga 3,6 milliard metr kub tabiiy gaz qayta ishlanib, qiymati 1 milliard dollardan ziyod bo‘lgan 1,5 million tonna tayyor suyuq mahsulotlar ishlab chiqariladi. Jumladan, 307 ming tonna aviakerosin, 724 ming tonna dizel yonilg‘isi, 437 ming tonna nafta, 53 ming tonna suyultirilgan gaz tayyorlanadi.