O‘zbekistonlik ziyoratchilarning dastlabki guruhi Hajga jo‘nab ketdi

18-iyunga o‘tar kechasi mahalliy vaqt bilan soat 01:10 da Uzbekistan Airways’ning bortida 245 nafar ziyoratchi bo‘lgan birinchi reysi Toshkentdan Madinaga (Saudiya Arabistoni) jo‘nab ketdi. Bu haqda Uzbekistan Airports matbuot xizmati xabar berdi.

Ma’lum qilinishicha, 18-iyun kuni Toshkentdan 02:50, 04:10 va 16:10 da xuddi shuncha yo‘lovchisi bo‘lgan yana uchta reys uchadi.

18-iyundan 30-iyungacha Madina shahriga O‘zbekistonning yetti hududidan samolyotlar uchishi rejalashtirilgan. Bu yil eng ko‘p ziyoratchilar Namangan shahriga tog‘ri kelmoqda – jami 16 ta reysda 3916 yo‘lovchi Hajni ado etish uchun Saudiya Arabistoniga jo‘nab ketadi. Poytaxtdan Hajga otlanganlar soni biroz kamroq – Saudiya Arabistoniga 15 reysda 3587 nafar yo‘lovchi ketishi kutilmoqda. Bortida 1209 yo‘lovchi bo‘lgan 5 ta samolyot Qarshidan, Samarqanddan uchta reys va 735 yo‘lovchi, Buxorodan 3 ta reys va 717 ta yo‘lovchi, Urganchdan ikkita samolyotda 490 ta yo‘lovchi, Nukusdan bitta reys va 246 ta ziyoratchi Haj safariga borishlari kutilmoqda.

Ziyoratchilar aeroportga maxsus avtobuslarda yetib keladi hamda ro‘yxatdan o‘tgandan so‘ng kutish zonasiga joylashtiriladi. Shu bilan birga, mazkur reyslar davomida poytaxt aeroporti estakadasida harakat vaqtincha cheklanadi va terminalga kirish faqat yo‘lovchilar uchun bo‘ladi. O‘zbekiston musulmonlari idorasi ham ziyoratchilarning yaqinlariga, terminal va vokzal atrofida tirbandlikning oldini olish maqsadida, o‘z yaqinlarini aeroportda emas, balki ziyoratchilarning safar oldidan yig‘ilish joylari — masjidlarda kuzatishni tavsiya qiladi.

“O‘z navbatida, Hajga boradiganlar uchun respublika aeroportlarida qo‘shimcha shart-sharoit va qulayliklar yaratildi. Toshkent aeroportida mazkur reyslar yo‘lovchilariga xizmat ko‘rsatish uchun B zonasida ikkita kutish zallari ta’mirdan o‘tkazildi va ishga tushirildi, bu yerda yetarli miqdorda o‘rindiqlar o‘rnatilib, ziyoratchilarga kutish davomida ichimliklar va gazaklar taklif etiladi”, — deyiladi xabarda.

Ma’lumot uchun, “Haj-2022” mavsumi uchun 1 nafar ziyoratchiga to‘lov miqdori 62 million 900 ming so‘m etib belgilangan. Narxlarning oshishiga Saudiya hukumati tomonidan Haj safari narxiga ta’sir qiluvchi qo‘shimcha soliq va majburiy to‘lovlar joriy qilingani, kommunal, transport, elektr-energiya va boshqa xizmatlar uchun to‘lovlar miqdori bir necha baravar (30-40 foiz) oshgani sabab bo‘lgan.