Hindistonda armiyaga chaqirish tizimining isloh etilishi haqidagi xabar bir qancha hududlarda norozilik namoyishlarini keltirib chiqardi, deb yozadi “Kommersant”. Xizmat muddatini to‘rt yilgacha qisqartirish rejalashtirilmoqda. Namoyishchilar harbiy xizmatga chaqiriluvchilarning 75 foizi to‘rt yildan keyin ishsiz bo‘lib qolishi va davlat imtiyozlaridan mahrum bo‘lishi ehtimolidan norozi.
Islohot Agnipath deb nom oldi. U harbiy xizmatga chaqiriluvchilarning aksariyati uchun qurolli kuchlardagi xizmat muddati to‘rt yilgacha qisqartirilishini ko‘zda tutadi. Bungacha Hindiston armiyasida o‘rtacha xizmat muddati 17 yilga teng edi.
The Indian Express gazetasi xabariga ko‘ra, Bixar shtatida namoyishchilar ikkita poyezdni yoqib yuborib, Bixiya shahrida temir yo‘l qatnovini to‘sib qo‘ygan. 16-iyun kuni hukumat Hindiston shimolidagi Xaryana shtatidagi tumanlardan birida mobil internetni o‘chirdi va havoga o‘q uzib namoyishchilarni tarqatib yuborishga urindi.
CNN aniqlik kiritishicha, aksiya ishtirokchilari Nyu-Delidan 50 km uzoqlikda yuqori mansabli amaldorning uyini toshbo‘ron qilganidan keyin ularni tiyib turish uchun o‘t ochgan. Shuningdek, muxolifat vakillari amaldagi bosh vazir Narendra Modi kiruvchi “Bxaratiya Janata parti” partiyasi ofisiga o‘t qo‘ygan. Qurolli kuchlar isloh etilishi haqida uning hukumati e’lon qilgan edi.
Hindiston armiyasiga harbiy xizmatchilarni olish tartibining o‘zgartirilishini vazirlar mahkamasi pensiya xarajatlarini qisqartirish va shaxsiy tarkib o‘rtacha yoshini pasaytirish zaruriyati bilan izohladi. Yangi qoidalarga muvofiq, harbiy xizmatchilarning bor-yo‘g‘i 25 foizi qurolli kuchlar tarkibida to‘rt yildan ko‘proq qolishi mumkin. “Atigi to‘rt yil ishlab bo‘lgandan keyin qayerga boramiz? To‘rt yillik xizmatdan keyin boshpanasiz qolamiz. Yo‘llarimizni to‘sib qo‘yishdi”, — deya o‘z noroziligi sababini izohladi namoyishchilardan biri.
Izoh (0)