Italiyada 44 yoshli erkak tibbiy yordam orqali o‘z joniga qasd qilish natijasida vafot etdi, bu mamlakatda birinchi shunday holat bo‘ldi, deb yozadi Deutsche Welle.
Nashr ma’lumotlariga ko‘ra, Federiko Karbonining o‘limi haqida evtanaziyani yoqlab kampaniyalar o‘tkazuvchi Luka Koshioni uyushmasi xabar bergan, ushbu guruh unga sudlarda va sog‘liqni saqlash organlarida o‘z niyatiga erishishda yordam bergan.
44 yoshli sobiq yuk mashinasi haydovchisida 10 yil avval yo‘l-transport hodisasi oqibatida bo‘ynidan pastki qismida falajlik yuzaga kelgan. U tetraplegiya — barcha qo‘l-oyoqlar falajiga chalingan va kecha-kunduz parvarishga muhtoj bo‘lgan.
“Hayot bilan vidolashganimdan afsusda ekanimni rad etmayman. Men yaxshiroq yashash uchun bor imkoniyatimni ishga soldim va o‘z nogironligimdan maksimum foyda olishga urindim, ammo hozir ham aqliy, ham jismoniy imkoniyatlarim yoqasiga kelib qoldim”, — deya bemorning o‘limidan oldingi gaplarini keltirib o‘tdi Luka Koshioni uyushmasi.
Ta’kidlanishicha, Italiyada kimgadir joniga qasd qilishda yordam berish aslida taqiqlangan bo‘lsa-da, 2019-yilda mamlakat Konstitutsiyaviy sudi ba’zi istisnolar bo‘lishi mumkinligi haqida qaror chiqargan edi.
Sud evtanaziya o‘tkazish uchun rioya qilinishi kerak bo‘lgan muayyan talablarni belgiladi. Masalan, bemorni davolab bo‘lmasligi, u hayotni saqlab turish vositalariga bog‘liqligi, jismoniy va ruhiy chidab bo‘lmas og‘riqlarni boshdan o‘tkazayotgani aniq bo‘lishi shart edi. Shuningdek, bemor qaror qabul qilish va uning oqibatlarini tushunishga to‘liq qodir bo‘lishi kerak edi.
Karboni 2021-yil noyabrida axloq bo‘yicha qo‘mitadan ruxsatnoma olib, sog‘liqni saqlash organlari bergan taqiqni yengib o‘tgan va ishni sudga oshirgandi. U mamlakatda yuridik ruxsatnomaga ega bo‘lgan birinchi odamga aylandi.
So‘ng u hayotiga nuqta qo‘yish uchun zarur bo‘lgan dori va maxsus uskuna uchun 5 ming yevro to‘plashiga to‘g‘ri keldi. Luka Koshioni uyushmasi mablag‘ yig‘ish uchun kraudfanding kampaniyasini ishga tushirdi.
Shu paytgacha Yevroittifoq mamlakatlaridan faqat Belgiya, Niderlandiya, Lyuksemburg va Ispaniya evtanaziyani qonuniylashtirgan davlatlar bo‘lib kelayotgan edi.
Izoh (0)