Yevrokomissiya ma’lum shartlar asosida Ukraina, Moldova va Gruziyaga Yevropa Ittifoqiga a’zolik uchun nomzod maqomini berishni tavsiya qilmoqchi. Bu haqda Bloomberg muhokamadan xabardor manbalarga tayanib yozdi.
Ko‘rib chiqilayotgan shartlar mamlakatlar qonunchiligining muayyan standartlarga muvofiqligi, qonun ustuvorligi va korrupsiyaga qarshi kurash bilan bog‘liq.
Yevrokomissiya o‘z qarorini 17-iyun, juma kuni e’lon qilishni rejalashtirmoqda. Yevropa Ittifoqiga nomzod davlat maqomini berish uchun ittifoq tarkibiga kiruvchi barcha 27 davlatning qo‘llab-quvvatlovi talab qilinadi.
16-iyun kuni Fransiya prezidenti Emmanuel Makron Kiyevga tashrifi chog‘ida Fransiya, Germaniya, Italiya va Ruminiyaning Ukrainaga zudlik bilan Yevropa Ittifoqiga nomzod davlat maqomini berish tarafdori ekanini aytdi.
Avvalroq Italiya bosh vaziri Mario Dragi “Yevropa Ittifoqining deyarli barcha yirik davlatlari Ukrainaga YI a’zoligiga nomzod maqomini berishga qarshi” ekani haqida gapirgan.
Ukraina Rossiya bosqini boshlanganidan bir necha kun o‘tib Yevropa Ittifoqiga qo‘shilish uchun ariza berdi. Rossiya dastlab Ukrainaning YIga kirishiga e’tiroz bildirmadi, biroq keyinchalik munosabatini o‘zgartirdi. Rossiya tashqi ishlar vazirligi vakillari Ukrainaning Yevropa Ittifoqiga qo‘shilish istagining zararsizligiga ham, uning YIga qabul qilish istiqbollariga ham shubha qilishini aytdi.
Izoh (0)