Ҳиндистонда армияга чақириш тизимининг ислоҳ этилиши ҳақидаги хабар бир қанча ҳудудларда норозилик намойишларини келтириб чиқарди, деб ёзади «Коммерсантъ». Хизмат муддатини тўрт йилгача қисқартириш режалаштирилмоқда. Намойишчилар ҳарбий хизматга чақирилувчиларнинг 75 фоизи тўрт йилдан кейин ишсиз бўлиб қолиши ва давлат имтиёзларидан маҳрум бўлиши эҳтимолидан норози.
Ислоҳот Agnipath деб ном олди. У ҳарбий хизматга чақирилувчиларнинг аксарияти учун қуролли кучлардаги хизмат муддати тўрт йилгача қисқартирилишини кўзда тутади. Бунгача Ҳиндистон армиясида ўртача хизмат муддати 17 йилга тенг эди.
The Indian Express газетаси хабарига кўра, Бихар штатида намойишчилар иккита поездни ёқиб юбориб, Бихия шаҳрида темир йўл қатновини тўсиб қўйган. 16 июнь куни ҳукумат Ҳиндистон шимолидаги Харяна штатидаги туманлардан бирида мобил интернетни ўчирди ва ҳавога ўқ узиб намойишчиларни тарқатиб юборишга уринди.
CNN аниқлик киритишича, акция иштирокчилари Нью-Делидан 50 км узоқликда юқори мансабли амалдорнинг уйини тошбўрон қилганидан кейин уларни тийиб туриш учун ўт очган. Шунингдек, мухолифат вакиллари амалдаги бош вазир Нарендра Моди кирувчи «Бхаратия Жаната парти» партияси офисига ўт қўйган. Қуролли кучлар ислоҳ этилиши ҳақида унинг ҳукумати эълон қилган эди.
Ҳиндистон армиясига ҳарбий хизматчиларни олиш тартибининг ўзгартирилишини вазирлар маҳкамаси пенсия харажатларини қисқартириш ва шахсий таркиб ўртача ёшини пасайтириш зарурияти билан изоҳлади. Янги қоидаларга мувофиқ, ҳарбий хизматчиларнинг бор-йўғи 25 фоизи қуролли кучлар таркибида тўрт йилдан кўпроқ қолиши мумкин. «Атиги тўрт йил ишлаб бўлгандан кейин қаерга борамиз? Тўрт йиллик хизматдан кейин бошпанасиз қоламиз. Йўлларимизни тўсиб қўйишди», — дея ўз норозилиги сабабини изоҳлади намойишчилардан бири.
Изоҳ (0)