1981 йилда ўша вақтда амалда бўлган АҚШ президенти Роналд Рейганга суиқасд уюштирган америкалик Жон Хинкли ҳеч қандай шартларсиз суд назоратидан озод қилинди. Бу ҳақда Хинкли Twitter’да маълум қилди, деб ёзади «РБК».
«41 йил, икки ой ва 15 кундан кейин, ва ниҳоят, озодлик!!!» — деб ёзди у.
Хинкли ўзига қўйилган чекловлардан 15 июнь куни озод бўлди. Бундан икки ҳафта аввалроқ эса Колумбия округи федерал суди судьяси Пол Фридман уни ҳибсдан озод этган эди.
Собиқ президент Роналд Рейганга суиқасдни Хинкли 1981 йил 30 мартда амалга оширган. У давлат раҳбари Вашингтондаги Ҳилтон меҳмонхонасидан чиқаётган пайтда унга ўқ узиб, ўпкасига теккизган эди. Рейгандан ташқари, Оқ уй матбуот котиби, махфий хизмат агенти ва полициячи ҳам яраланганди. CBS News маълумотларига кўра, Хинкли психоз касаллигига чалинган бўлиб, ўзи ишқибоз бўлган актриса Жоди Фостернинг эътиборига тушмоқчи бўлган.
1982 йилда суд уни ақли норасо деб топди ва руҳий касалликлар шифохонасига мажбурий даволаниш учун юборди, у 2016 йилгача ўша ерда қолди. Сўнг Хинклига Виржиния штати Уильямсберг шаҳридаги кекса онасининг уйига кўчиб ўтишга рухсат беришди, аммо унга маълум бир шартларни юклашди. Хусусан, у уйидан 50 мил (80 км)дан кўпроқ масофага узоқлашиши тақиқланганди, мутахассислар унинг телефони таркибини кузатиб борарди. Шунингдек, Хинкли ҳафтада камида бир марта психотерапия сеансларига бориши шарт эди, ижтимоий тармоқларда аккаунтлар очиши ва интернетга қандайдир материаллар юклаши ман қилинганди.
Роналд Рейган 1981 йилдан 1989 йилгача АҚШ президенти бўлган. У дастлаб профессионал актёр бўлган, сўнг Калифорния губернаторига айланган. 1980 йилда у АҚШ президенти лавозимига сайланган. У давлат раҳбари бўлган даврда СССР Афғонистонда ҳарбий операция ўтказган, «Эрон-контрас» сиёсий можароси ҳам ўшанда юз берган. 1987 йилда, Рейган ҳокимият тепасида бўлган пайтда, Вашингтонга КПСС (Совет иттифоқи коммунистик партияси) Марказий қўмитаси бош котиби Михаил Горбачёв ташриф буюрган. Учрашув якунлари бўйича мамлакатлар ўртасида Ўрта ва кичик масофали ракеталарни йўқ қилиш ҳақидаги шартнома тузилган. 1988 йилда Рейган Москвага келган. У 2004 йилда Альцгеймер касаллиги оқибатларидан вафот этган.
Изоҳ (0)