Gollivud yulduzi Jonni Depp sobiq rafiqasi Ember Xyord bilan bo‘lib o‘tgan sud jarayonida o‘zini qo‘llab-quvvatlaganlarga minnatdorchilik bildirgan posti 19,1 milliondan ortiq layk va 1 milliondan ortiq izoh to‘pladi, deb xabar beradi “Pravilamag”.
Shunday qilib, Deppning 2-iyundagi posti Instagram ijtimoiy tarmog‘i tarixidagi eng mashhur postlardan biriga aylanib, top-20 talikdan o‘rin oldi. Layklar soni bo‘yicha birinchi o‘rinni tuxum rasmi egallagan (@wold_record_egg — 56 milliondan ortiq layk). Shuningdek, rekordchilar orasida Krishtianu Ronaldu, XXXTentacion, Ariana Grande, Zendaya, Billi Aylish va boshqa mashhurlarning postlari ham bor.
Depp o‘z postida minnatdorchilik bildirib, avvalboshidan qanday natijaga erishishidan qat’i nazar, haqiqatga erishishni niyat qilganini yozgan. Shuningdek, u o‘zi bilan sodir bo‘lgan voqea shunday vaziyatga tushganlarga yordam berishiga umid qilmoqda. Aktyorning postiga layk bosganlar orasida Patti Smit, Bella Xadid, Naomi Kempbell, Rita Ora, Peris Xilton va boshqa ko‘plab yulduzlarni uchratish mumkin.
“Haqiqat hech qachon o‘lmaydi”, — deya xulosa qiladi aktyor.
Gollivud yulduzlari Jonni Depp va Ember Xyord o‘rtasidagi mojaro anchadan buyon barchaga ma’lum. Ayol sobiq erini oiladagi zo‘ravonlikda ayblagan. Bu haqda Xyord 2018-yilda The Washington Post’ga bergan intervyusida ma’lum qilgan. O‘tgan hafta aktyor tuhmat uchun 50 million dollar talab qilib, sudga shikoyat arizasi kiritgan — sud esa unga 15 million to‘lanishi bo‘yicha qaror chiqardi.
Izoh (0)