Jonni Depp va Ember Xyord sudida ishtirokchilar taqqan qog‘oz bilaguzuklar sotilmoqda. Narxlar qariyb 5 ming dollarga chiqqan

Butun dunyoga ovoza bo‘lgan Jonni Depp va uning sobiq rafiqasi Ember Xyordning sud jarayonida ishtirokchi hamda kuzatuvchilar taqqan qog‘oz bilaguzuklar eBay orqali sotuvga qo‘yildi, deb xabar beradi “Pravilamag”.

Nashr ma’lumotlariga ko‘ra, bitta bilaguzuk narxi 50 dollardan 4999 dollargacha chiqmoqda. Sotuvchilarning odatda tovar “yaxshi holatda saqlanganini” yozyapti. Qog‘oz bilaguzuklarni jurnalistlar, kuzatuvchilar, yuristlar va sud ishchilari taqqan.

Ko‘plab sotuvchilar bilaguzuk “epik tarixiy sud jarayonini bir qismi” ekanini aytib, tovarlarni sotib olishni tavsiya qilmoqda. Shu bilan birga, sud zalida bo‘lmagan insonlar ham bilaguzuklarini sotishga urinyapti. Ularning aytishicha, bu baribir “eslab yurish uchun” yaxshi buyum.

Sud jarayoni vaqtida aktyorlarning yuzlab muxlislari zaldagi 100 o‘ringa berilgan bilaguzuklarni qo‘lga kiritish uchun soatlab navbat kutgan.

Gollivud yulduzlari Jonni Depp va Ember Xyord o‘rtasidagi mojaro anchadan buyon barchaga ma’lum. Ayol sobiq erini oiladagi zo‘ravonlikda ayblagan. Bu haqda Xyord 2018-yilda The Washington Post’ga bergan intervyusida ma’lum qilgan. O‘tgan hafta aktyor tuhmat uchun 50 million dollar talab qilib, sudga shikoyat arizasi kiritgan — sud esa unga 15 million to‘lanishi bo‘yicha qaror chiqardi.