Голливуд юлдузи Жонни Депп собиқ рафиқаси Эмбер Хёрд билан бўлиб ўтган суд жараёнида ўзини қўллаб-қувватлаганларга миннатдорчилик билдирган пости 19,1 миллиондан ортиқ лайк ва 1 миллиондан ортиқ изоҳ тўплади, деб хабар беради «Правиламаг».
Шундай қилиб, Деппнинг 2 июндаги пости Instagram ижтимоий тармоғи тарихидаги энг машҳур постлардан бирига айланиб, топ-20 таликдан ўрин олди. Лайклар сони бўйича биринчи ўринни тухум расми эгаллаган (@wold_record_egg — 56 миллиондан ортиқ лайк). Шунингдек, рекордчилар орасида Криштиану Роналду, XXXTentacion, Ариана Гранде, Зендая, Билли Айлиш ва бошқа машҳурларнинг постлари ҳам бор.
Депп ўз постида миннатдорчилик билдириб, аввалбошидан қандай натижага эришишидан қатъи назар, ҳақиқатга эришишни ният қилганини ёзган. Шунингдек, у ўзи билан содир бўлган воқеа шундай вазиятга тушганларга ёрдам беришига умид қилмоқда. Актёрнинг постига лайк босганлар орасида Патти Смит, Белла Хадид, Наоми Кемпбелл, Рита Ора, Перис Хилтон ва бошқа кўплаб юлдузларни учратиш мумкин.
«Ҳақиқат ҳеч қачон ўлмайди», — дея хулоса қилади актёр.
Голливуд юлдузлари Жонни Депп ва Эмбер Хёрд ўртасидаги можаро анчадан буён барчага маълум. Аёл собиқ эрини оиладаги зўравонликда айблаган. Бу ҳақда Хёрд 2018 йилда The Washington Post’га берган интервьюсида маълум қилган. Ўтган ҳафта актёр туҳмат учун 50 миллион доллар талаб қилиб, судга шикоят аризаси киритган — суд эса унга 15 миллион тўланиши бўйича қарор чиқарди.
Изоҳ (0)