Ўзбекистонда «Санъат экспорти» миллий лойиҳаси жорий этилиши мумкин

Маданият вазирлиги «Ўзбек халқининг миллий қадриятлари, номоддий маданий меросини муҳофаза қилиш ва оммалаштириш тўғрисида»ги президент қарори лойиҳасини муҳокамага қўйди.

Ҳужжат билан қуйидагилар:

• 2022—2026 йилларда номоддий маданий меросни муҳофаза қилиш давлат дастури;
• ЮНЕСКОнинг тегишли халқаро рўйхатларига Ўзбекистон ҳудудидаги номоддий маданий меросларни киритиш бўйича тайёрланадиган номзодномалар;
• номоддий маданий меросни тадқиқ этиш бўйича ташкил этиладиган маҳаллий ва хорижий комплекс этнофольклор экспедициялар рўйхати;
• номоддий маданий меросни илмий тадқиқ этиш ва тарғиб қилиш бўйича фундаментал ва мақсадли грантлар рўйхати;
• Номоддий маданий мерос намуналарини инновацион ахборот технологиялардан фойдаланган ҳолда рақамли ҳужжатлаштириш тасдиқланади.

Белгиланишича, давлат дастурини амалга ошириш, номоддий маданий мерос элементларини ЮНЕСКОнинг тегишли халқаро рўйхатларига киритиш, комплекс фольклор экспедициялар ташкил этиш, фундаментал ва мақсадли грантлар ҳамда номоддий маданий меросни рақамли ҳужжатлаштиришга доир харажатлар давлат бюджети ҳамда қонунчилик ҳужжатлари билан тақиқланмаган бошқа манбалар ҳисобидан қопланади.

Шунингдек, қарор билан хорижий давлатларда Ўзбекистоннинг халқ ижодиёти санъатини кенг тарғиб этиш орқали бахши, жиров, оқин ва фольклор-этнографик ансамблларнинг гастрол сафарларини тизимли амалга ошириш мақсадида 2022—2026 йилларга мўлжалланган «Санъат экспорти» миллий лойиҳаси жорий этилади.

Маданият вазирлиги, Инвестициялар ва ташқи савдо вазирлиги, Ташқи ишлар вазирлиги уч ой муддатда «Санъат экспорти» миллий лойиҳасини хорижий давлатларда амалга ошириш бўйича манзилли режасини тасдиқлаши ва амалга ошириши керак.

Бунда қуйидагилар назарда тутилади:

• бахши, жиров, оқин ва фольклор-этнографик ансамблларнинг хорижий давлатларда маданий хизмат кўрсатиш сервиси тизими орқали концерт-томоша дастурларини белгиланган тартибда тизимли ташкил этиш;
• қадриятлар ва урф-одатлар асосида тайёрланган миллий модалар намойиши, ҳунармандчилик кўргазмаларини амалга ошириш;
• хорижий давлатлардаги ватандошлар томонидан кенг тарғиб этилишини таъминлаш бўйича ўзбек миллий қадриятлари ва маданиятини ўзида мужассам этган кийимлар ва ҳунармандчилик маҳсулотларини доимий етказиб бериш.

2023 йил 1 январдан бошлаб:

• номоддий маданий меросни доимий ривожлантириш ва тарғиб этиб бориш мақсадида «Тайёрлаш – ўргатиш – ўрганиш – тиклаш – сақлаш – оммалаштириш – сотиш» узлуксиз яхлит тизими асосида кластерлар ташкил этилади;

дўмбира, чанқўбиз, сибизға чолғу усталари, каштачилик, ҳунармандчилиги, қорабайир отларини парвариш қилиш ҳамда уларни реализация билан шуғулланувчи шахслар:

• ўзини ўзи банд қиладиган шахслар учун фаолият (ишлар, хизматлар) турлари рўйхатига киритилади;
• бевосита ушбу фаолият учун тижорат банкларидан олган кредитларининг Марказий банкнинг қайта молиялаш ставкаси бўйича бўлган қисми Тадбиркорликни ривожлантириш агентлиги ҳузуридаги Тадбиркорлик фаолиятини қўллаб-қувватлаш давлат жамғармаси ҳисобидан кафиллик ва/ёки компенсация шартлари асосида қоплаб берилади;
• дўппидўзлик ва эгар-жабдуқ ясаш билан шуғулланаётган ҳунармандлар иштирокида 1 йиллик уста-шогирд мактаблари ташкил қилинади ҳамда ушбу мактабни йўлга қўйган усталар учун 1 йил давомида беш баробар базавий ҳисоблаш миқдорида ойлик маош Вазирлар Маҳкамасининг заҳира жамғармасидан тўланади.

Шунингдек, 2023 йил 1 майга қадар ўзбек халқ миллий қадриятлари ва маънавий меросини асраб-авайлаш ҳамда ривожлантиришга қаратилган «Қадрият» платформаси яратилади.