O‘zbekistonda to‘siqsiz turizm infratuzilmasi rivojlantiriladi

Turizm va madaniy meros vazirligi “O‘zbekiston Respublikasida to‘siqsiz turizm infratuzilmasini rivojlantirish va uni rag‘batlantirish chora-tadbirlar to‘g‘risida”gi prezident qarori loyihasini muhokamaga qo‘ydi.

Hujjat loyihasiga ko‘ra, quyidagilar O‘zbekistonda to‘siqsiz turizmni rivojlantirish va qulay shart-sharoitlar yaratishning asosiy yo‘nalishlari etib belgilanmoqda:

• turizm namoyishi obyektlari infratuzilmasi, birinchi navbatda madaniy meros obyektlari, ziyorat obyektlari, muzeylar, teatrlar va joylashtirish vositalarida nogironligi bo‘lgan shaxslar uchun zaruriy shart-sharoitlar yaratish;
• turizm sohasi subyektlari, shu jumladan, turoperator va turagentlar, joylashtirish vositalari hamda transport xizmatlarini ko‘rsatuvchi tadbirkorlik subyektlari, shuningdek, nogironligi bo‘lgan shaxslarga sayohat davomida hamrohlik qiluvchi fuqarolarni rag‘batlantirish;
• nogironligi bo‘lgan shaxslarning to‘siqsiz turizmni amalga oshirishlari uchun yaratilgan imkoniyatlarni tizimli hamda faol targ‘ibot kampaniyalarini tashkil etish orqali ular xabardorligini oshirish;
• zamonaviy axborot texnologiyalari imkoniyatlaridan foydalangan holda turizm namoyishi obyektlarida ko‘rsatiladigan xizmatlar sifatini oshirish;
• nodavlat notijorat tashkilotlarini qo‘llab-quvvatlash, jumladan, fuqarolar va homiylar xayriyalari hamda xorijiy tashkilotlarning grant mablag‘larini jalb qilish tizimini takomillashtirish orqali to‘siqsiz turizmni amalga oshirish.

Shuningdek, 2023-yildan boshlab respublika hududlarida quyidagi bosqichlarda “To‘siqsiz turizm infratuzilmasini rivojlantirish dasturi” amalga oshiriladi:

• 2023-yilda Samarqand, Buxoro, Xorazm va Qashqadaryo viloyatlari;
• 2024-yilda Farg‘ona, Namangan, Andijon va Jizzax viloyatlari;
• 2025-yilda Qoraqalpog‘iston Respublikasi, Navoiy, Surxondaryo va Sirdaryo viloyatlari;
• 2026-yilda Toshkent shahar va Toshkent viloyatlari;
• O‘zbekistonning davlat budjeti, homiylik mablag‘lari va grvntlar “To‘siqsiz turizm infratuzilmasini rivojlantirish dasturi”ni moliyalashtirish manbalari hisoblanadi;
• 2022—2026-yillarga mo‘ljallangan Yangi O‘zbekistonning taraqqiyot strategiyasi va uni amalga oshirishga oid davlat dasturida respublika hududlarida “To‘siqsiz turizm infratuzilmasini rivojlantirish dasturi”ni amalga oshirishga qaratilgan chora-tadbirlar belgilanadi.

2023-yil 1-yanvardan boshlab:

• madaniy meros obyektlarini restavratsiya qilish va tiklash uchun davlat budjetidan ajratiladigan mablag‘larning 2 foizi nogironligi bo‘lgan shaxslarning to‘siqsiz harakatlanishi uchun madaniy meros obyektlariga har qanday shikast yetkazishning oldini olgan holda pandus, plintus va liftlar o‘rnatishga yo‘naltiriladi;
• “2022—2026-yillarga mo‘ljallangan Yangi O‘zbekistonning taraqqiyot strategiyasi to‘g‘risida”gi farmonga asosan davlat budjetidan Turizm va madaniy meros vazirligi huzuridagi budjetdan tashqari Turizmni qo‘llab-quvvatlash jamg‘armasiga ajratilgan mablag‘larning 5 foizi:
• respublikaning to‘siqsiz turizm salohiyatini (video, foto va tarqatma materiallar tayyorlash) OAV, ijtimoiy tarmoqlarda, shuningdek, ommaviy axborot vositalari vakillari va jurnalistlar uchun infoturlar tashkil qilish;
• xalqaro va xorijiy turizm ko‘rgazma, yarmarkalarda respublikada to‘siqsiz turizm yo‘nalishida mamlakatning salohiyatini namoyish qiluvchi targ‘ibot va tarqatma materiallar tayyorlash;
• “Ipak yo‘lida turizm” Toshkent xalqaro turizm yarmarkasida “O‘zbekistonda to‘siqsiz turizm” ekspozitsiyasini tashkil etish va o‘tkazish uchun yo‘naltiriladi.

Bundan tashqari, qaror loyihasiga muvofiq, 2023/2024-o‘quv yilidan boshlab davlat va davlat ulushi mavjud bo‘lgan oliy ta’lim muassasalariga o‘qishga qabul qilishning davlat buyurtmasi parametrlarida “Turizm”, “Gid hamrohligi” hamda “Mehmonxona xo‘jaligini tashkil etish va boshqarish” ta’lim yo‘nalishlari bo‘yicha davlat buyurtmasi parametrlarining 1 foizi miqdorida davlat grantlariga kvotalar ajratish tizimi joriy qilinadi.

Avvalroq O‘zbekiston tarixi, madaniyati va o‘zbek tilining xorij davlatlarida targ‘ibotiga 10 mlrd so‘m ajratilishi mumkinligi, O‘zbekiston va Rossiya turizm sohasidagi hamkorlikni rivojlantirishga kelishib olgani to‘g‘risida xabar berilgandi.