Qishloq xo‘jaligi vazirligi huzuridagi Sabzavot, poliz ekinlari va kartoshkachilik ilmiy-tadqiqot institutining qishloq xo‘jaligi fanlari nomzodi Yekaterina Lyan boshchiligidagi seleksioner olimlari yangi qovun navini ixtiro qildi. Bu haqda vazirlik matbuot xizmati xabar berdi.
Ma’lum qilinishicha, “Zarhal” nomi berilgan ushbu duragay faqat issiqxonada yetishtiriladi. “Zarhal” o‘ta erta pishar nav bo‘lib, u 72—78 kun davomida o‘sadi. Uning palagi baquvvat, sershox. Bargi esa, keng, qalin, to‘q yashil rangli, qirqimlidir.
Hosili sharsimon, o‘rtacha kattalikda bo‘lib, og‘irligi atigi 0,8—1,5 kilogramm keladi. Yuzasi esa tekis, sariq rangda. Ustida yashil rangli chiziqlar tortilgan. Ichki qismi oqish, xo‘shbo‘y hidli.
“Zarhal”ning tarkibidagi quruq modda miqdori 13,5—14,5 foizni tashkil etsa, qand miqdori 12-13 foizdangina iborat.
Hosildorligi 8—8,5 kilogramm/metr kvadratga teng bo‘lgan ushbu qovun navi un shudring va fuzarios so‘lish kasalligiga chidamlidir.
Avvalroq O‘zbekistonlik olimlar import o‘rnini bosuvchi yangi qulupnay navini yaratilgani to‘g‘risida xabar berilgandi.
Mavzuga doir: O‘zbekistonda pomidorning yangi navi ixtiro qilindi
Izoh (0)