Gurlan tumani hokimi Xorazm viloyati hokimiga o‘rinbosar bo‘ldi

Gurlan tumani hokimi Murodjon Achilov Xorazm viloyati hokimi o‘rinbosari lavozimiga tayinlandi.

Viloyat hokimligi matbuot xizmatining xabar berishicha, u hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i bo‘ldi.

Murodjon Achilov tayinlovga qadar 2020-yilning 21-aprelidan buyon Gurlan tumani hokimi lavozimida ishlab kelayotgandi.

U 2021-yilning noyabrida ish faoliyati davomida o‘ziga yuklatilgan vazifalarni bajarishda sustkashlikka yo‘l qo‘ygani hamda o‘z vazifasiga mas’uliyatsizlik bilan yondoshib, jiddiy kamchiliklarga yo‘l qo‘ygani uchun Xorazmdagi 12 ta tuman-shahar hokimlari qatorida jazolanib, hayfsan olgandi.