Наманган вилояти ҳокими бу ҳақда талаба ва магистларнинг стартап лойиҳалари тақдимоти давомида айтиб ўтди, дея хабар беради «Дарё» мухбири Азизбек Абдувалиев.
Тадбир вилоят ҳокимининг талаба-ёшлар билан ўтган галги мулоқотидан сўнг молиялаштиришга тавсия этилган лойиҳа эгаларига сертификатлар топширилиши билан бошланди.
Талабалардан бири кўчаларни ёритишда энергия тежаш имконини берувчи лойиҳани амалга ошириш учун 60 миллион сўм, бири физика фани оммалаштиришга мўлжалланган жиҳозлар комплекти учун 54 миллион сўм, яна бири эса смарт-глобус лойиҳаси учун 30 миллион сўмлик сертификат билан тақдирланди.
Бу галги тақдимотда муқобил энергия воситаларига оид лойиҳалар етакчилик қилди. Талабалар хонадон ва корхона-ташкилотларни ёритиш ҳамда иситишга мўлжалланган стартапларни тақдим этди. Вилоят ҳокими мазкур лойиҳаларнинг барчаси кўриб чиқиш ва амалиётга жорий этишга лойиқ эканини таъкидлаб, бунинг учун очиқ танлов ўтказишни таклиф этди.
Шунингдек, олхўри данагидан ёғ олиш ва ақлли чиқинди қутиси лойиҳалари ҳам кўпчиликнинг эътиборини тортди. Талаба қизлардан бири эса Миланда ўтказиладиган модалар фестивалида иштирок этишга таклиф олганини билдириб, вилоят раҳбаридан бу сафарни ташкиллаштиришда ёрдам сўради.
Мулоқот икки соатдан ортиқ давом этаётган бўлса ҳам, таклиф ва мурожаатларнинг охири кўринмасди. Шавкат Абдураззақов буни талабаларнинг инновацион ишлари узоқ вақт эътибордан четда қолиб кетгани билан изоҳлади.
«Бу бизнинг камчилигимиз. Аксар ҳолатларда талабаларнинг ишланмалари олий ўқув юрти даражасида қолиб кетган. Бугунги тақдимотда кўряпмизки, уларнинг катта қисми керак бўлса ҳозироқ молиялаштиришга тайёр. Шу учун вилоятда талабаларнинг стартап лойиҳаларни қўллаб-қувватлайдиган ‘Ёш инноваторлар’ жамғармасини ташкил этиб, бошланишига 1 миллиард сўм маблағ ажратамиз. Устозлар, олимларимиздан иборат кенгаш тузиб, лойиҳаларни саралашни уларга топширсак. Чунки асли ҳоким билан учрашгандан кейингина масалалар ҳал этилиши нотўғри: тизим ишлаши керак», — деди Шавкат Абдураззақов.
Изоҳ (0)