Грузия президенти ҳукумат унга Украинага боришни тақиқлаб қўйганини айтди

Грузия президенти Саломе Зурабишвили ҳукумат унга Франция, Польша ва Украинага расмий ташрифларни тақиқлаб қўйганини маълум қилди, деб ёзади «РБК». У ушбу мамлакатларга Грузияга Евроиттифоққа кириш учун номзод мақоми берилиши жараёнида кўмак олиш учун боришни режалаштирганди.

Аввалроқ Европарламент резолюция қабул қилиб, Грузия ҳукуматини ОАВлар эркинлигини қўллаб-қувватлашга ва бизнесмен Бидзина Иванишвилига «Кремль билан алоқалари ҳамда журналистлар ва сиёсий рақибларини таъқиб қилиш имконини берувчи ҳукуматдаги алоқалари учун» шахсий санкцияларни кўриб чиқишга чақирган эди. Тбилиси ушбу шартларни бажарса, Европарламент Евроиттифоқ институтларини Грузияга иттифоққа кириш учун номзод мақомини тақдим этишни кўриб чиқишга ваъда берди.

Зурабишвили бундай резолюция қабул қилиниши юзасидан афсус билдирди.

«Мен ўзим ҳам, ҳукумат бизнинг номзодимизни қўллаб-қувватлаш учун ҳамма нарсани қилгани ва ортиқча фаолликка ҳожат йўқлигини айтишганидан кейин, бу эҳтимол мақсадга мувофиқ эмас, деб ўйладим, бу ерда мен бир ўзим бутун ҳукуматни ҳаракатсизликдан қутқара оладиган вазиятда эмасман», — деди Грузия президенти.

Newsgeorgia портали ёзишича, ҳукумат унинг расмий ташрифига рухсат бермаган бўлса-да, Зурабишвили халқаро аёллар пацифистик анжуманида қатнашиш учун Еврокенгаш президенти Шарл Мишелнинг таклифи билан Брюсселга келган.

25 февраль куни, Россия Украинада ҳарбий операция бошлаб, бошқа мамлакатлар унга қарши санкциялар жорий қилишга киришганидан кейин, Грузия бош вазири Ираклий Гарибашвили иқтисодий ва молиявий санкцияларга қўшилиш республика аҳолисига зарар келтиришини айтди, аммо Тбилиси Киевни қўллаб-қувватлашини таъкидлади. Айни вақтда, Зурабишвили 1 апрель куни мамлакат Украинани қўллаб-қувватлаш учун барча халқаро молиявий санкциялар ва резолюцияларда иштирок этаётганини маълум қилди.

Грузия Евроиттифоққа кириш учун аризани Молдова билан биргаликда март ойи бошида Украинадан кейин топширган эди. Май бошида Грузия Евроиттифоққа аъзолик учун номзод мақомини олиш учун анкета-сўровноманинг биринчи қисмини топширди.