Bugungi kunda O‘zbekistonning 70 foiz yoki 31,4 million gektar yeri qurg‘oqchil maydonlardan iborat. Bu haqda 10-iyun kuni AOKAda o‘tkazilgan brifingda O‘rmon xo‘jaligi davlat qo‘mitasi axborot xizmati rahbari Otabek Ashurov ma’lum qildi.
Otabek Ashurovning aytishicha, mamlakatda so‘nggi 20 yil ichida millionlab gektar yerlar sho‘rlangan.
“Hozirgi kunda O‘zbekistonning 70 foiz yoki 31,4 million gektar yeri qurg‘oqchil maydonlardan iborat bo‘lib, ularni asosan tabiiy sho‘rlangan, ko‘chma barxan qumliklar va qumli cho‘llar hamda issiq garmsel shamollari ta’siridagi hududlar tashkil qiladi. Orol dengizi suv sathining qurishi tufayli O‘zbekistonda yana qo‘shimcha 3 million gektardan ortiq maydonda Orolqum paydo bo‘ldi. Natijada ushbu regionda ekologik muhit yomonlashib, cho‘llanish jarayonlari yanada kuchaydi va ko‘plab ijtimoiy muammolarni yuzaga keltirdi. Birgina Orolbo‘yi mintaqasida joylashgan Qoraqalpog‘iston Respublikasi, Buxoro, Navoiy va Xorazm viloyatlarida 2000—2018-yillar davomida 8 million gektardan ortiq yer maydonlari turli darajada sho‘rlandi va 1 million gektar yer maydonlarida eroziya holatlari kuzatildi. Bu esa ushbu regionning 96 foiz hududini tashkil etadi. Cho‘llanish ta’sirida ushbu region hududlarida yetishtirilayotgan qishloq xo‘jaligi ekinlarining hosildorligi qariyib 40-45 foizgacha kamayib ketdi” – dedi agentlik vakili.
Otabek Ashurovning ta’kidlashicha, 2050-yilga borib qurg‘oqchilik dunyo aholisining to‘rtdan uch qismiga ta’sir qilishi mumkin.
“Yerning tanazulga uchrashi va iqlim o‘zgarishi natijasida kuchaygan qurg‘oqchilik tez-tez va shiddatli bo‘lib bormoqda. Bu 2000-yilga nisbatan 29 foiz ko‘p va har yili 55 million kishiga ta’sir qiladi. Bu global va dolzarb muammo. So‘ngi qurg‘oqchilik dunyo uchun xavfli kelajakka ishora qilmoqda”, – deydi qo‘mita xodimi.
Izoh (0)