Бугунги кунда Ўзбекистоннинг 70 фоиз ёки 31,4 миллион гектар ери қурғоқчил майдонлардан иборат. Бу ҳақда 10 июнь куни АОКАда ўтказилган брифингда Ўрмон хўжалиги давлат қўмитаси ахборот хизмати раҳбари Отабек Ашуров маълум қилди.
Отабек Ашуровнинг айтишича, мамлакатда сўнгги 20 йил ичида миллионлаб гектар ерлар шўрланган.
«Ҳозирги кунда Ўзбекистоннинг 70 фоиз ёки 31,4 миллион гектар ери қурғоқчил майдонлардан иборат бўлиб, уларни асосан табиий шўрланган, кўчма бархан қумликлар ва қумли чўллар ҳамда иссиқ гармсел шамоллари таъсиридаги ҳудудлар ташкил қилади. Орол денгизи сув сатҳининг қуриши туфайли Ўзбекистонда яна қўшимча 3 миллион гектардан ортиқ майдонда Оролқум пайдо бўлди. Натижада ушбу регионда экологик муҳит ёмонлашиб, чўлланиш жараёнлари янада кучайди ва кўплаб ижтимоий муаммоларни юзага келтирди. Биргина Оролбўйи минтақасида жойлашган Қорақалпоғистон Республикаси, Бухоро, Навоий ва Хоразм вилоятларида 2000—2018 йиллар давомида 8 миллион гектардан ортиқ ер майдонлари турли даражада шўрланди ва 1 миллион гектар ер майдонларида эрозия ҳолатлари кузатилди. Бу эса ушбу регионнинг 96 фоиз ҳудудини ташкил этади. Чўлланиш таъсирида ушбу регион ҳудудларида етиштирилаётган қишлоқ хўжалиги экинларининг ҳосилдорлиги қарийиб 40-45 фоизгача камайиб кетди» – деди агентлик вакили.
Отабек Ашуровнинг таъкидлашича, 2050 йилга бориб қурғоқчилик дунё аҳолисининг тўртдан уч қисмига таъсир қилиши мумкин.
«Ернинг таназулга учраши ва иқлим ўзгариши натижасида кучайган қурғоқчилик тез-тез ва шиддатли бўлиб бормоқда. Бу 2000 йилга нисбатан 29 фоиз кўп ва ҳар йили 55 миллион кишига таъсир қилади. Бу глобал ва долзарб муаммо. Сўнги қурғоқчилик дунё учун хавфли келажакка ишора қилмоқда», – дейди қўмита ходими.
Изоҳ (0)