Samarqandda somon ortilgan yuk mashinasi yonib ketdi (video)

Samarqand viloyatining Urgut tumanida me’yoridan ortiq somon ortib ketayotgan mashina elektr simlariga tegib ketishi oqibatida yong‘in yuzaga keldi.

Viloyat IIB matbuot xizmati xabariga ko‘ra, voqea 9-iyun kuni soat 10:00 larda tumanning “Guliston” MFY hududida yuz bergan. Haydovchi “ZIL” yuk mashinasiga me’yorlardan ortiq balandlikda somon ortgani uchun harakatlanib ketayotgan vaqtida elektr tarmoqlaridagi simlarga tegib qolgan.

Shundan so‘ng ular elektr simini tepaga ko‘tarmoqchi bo‘lganida qisqa tutashuv hamda chaqnash sodir bo‘lib, transport vositasiga ortilgan 400 dona somon presi yonib ketgan.

Samarqand FVB matbuot xizmatining ma’lum qilishicha, 2 ta yong‘in-qutqaruv ekipaji voqea joyiga soat 10:11 da yetib borib, yong‘in soat 10:15 da qurshab olingan va soat 10:50 da bartaraf etilgan.

Hodisa oqibatida jarohat olganlar yo‘q. Holat yuzasidan tergovga qadar tekshiruv harakatlari olib borilmoqda.