Shavkat Mirziyoyev raisligida qayta tiklanuvchi energiyadan foydalanishni kengaytirish bo‘yicha ustuvor vazifalarga bag‘ishlangan yig‘ilish bo‘lib o‘tayotgani to‘g‘risida xabar berilgandi. Yig‘ilishda davlat rahbari 2022-yilda barcha OTMlarda quyosh panellarini o‘rnatish bo‘yicha topshiriq berdi, deb xabar beradi prezident matbuot kotibi.
Ma’lum qilinishicha, Mendeleyev nomidagi kimyo-texnologiya universitetida 100 kilovatt quvvatli quyosh elektr uskunasi o‘rnatilib, yiliga 200 ming kilovatt soat elektr energiyasi ishlab chiqarilmoqda, 36 ta suv isitish qurilmasini o‘rnatish hisobiga yiliga 4,2 million kilovatt soat yoki qariyb 2 milliard so‘mlik elektr energiyasi tejalmoqda.
Oliy ta’lim vazirligiga ushbu tajribani barcha oliygohlarda 2022-yilning o‘zida joriy qilish topshirilgan.
Prezident vazirlik va idora, hokimlik, mahalla binolarini ham muqobil energiyaga o‘tkazish vaqti kelganini ta’kidlagan. Vazirlik va idoralarda elektr va issiqlik energiyasi xarajatlarini kamida 25 foizga qisqartirish bo‘yicha dastur ishlab chiqish topshirilgan.
Moliya vazirligi:
- davlat idoralarida energiya resurslari iste’moli bo‘yicha normativlarni ishlab chiqadi;
- yil yakuni bilan xarajatlarni kamaytirmagan rahbarlarga nisbatan chora ko‘rish bo‘yicha taklif kiritadi;
- xorijiy konsultantlarni jalb qilib, barcha iqtisodiyot tarmoqlari va ijtimoiy obyektlarda Energiya tejamkorlik milliy dasturini ishlab chiqadi.
Izoh (0)