Ijtimoiy tarmoqlarda o‘qishni ko‘chirish bilan bog‘liq yangi tartib muhokamalarga sabab bo‘ldi. Oliy va o‘rta maxsus ta’lim vaziri Abduqodir Toshqulov mazkur tartib borasida noto‘g‘ri talqin qilinayotgan fikrlarga munosabat bildirdi.
Oliy va o‘rta maxsus ta’lim vazirligi e’lon qilgan videoda Abduqodir Toshqulov o‘qishni ko‘chirishdagi qat’iy shartlarni belgilashning asosiy sabablari haqida gapirgan.
“Nima uchun bunday qilindi? Chunki bu borada korrupsiya va firibgarlar ko‘payib ketdi. Oddiy misol, talaba kelib, “hurmatli vazir, bizning guruhdan 7 kishi o‘qishini ko‘chirishga hujjat toshirdi. Shundan 3 tasi o‘tdi. Mana men boquvchisini yo‘qotganman, qolib ketdim. Hammamiz bir xil yo‘nalishni tanlaganmiz. Nega ular o‘tdi-yu, men o‘tolmadim”, degan savol beryapti. Men bunga doim ham javob bera olamayman. Bu yerda adolat mezoni buzilgan. Ya’ni tanish-bilishchilik bo‘lgan, qo‘ng‘iroq bo‘lgan va hokazo. Shuning uchun ham ta’limda raqobat bo‘lishi uchun ozgina qat’iyat, tartiblar bo‘lishi kerak. Mana xorijga borsangiz, masalan, Janubiy Koreyada u institutdan bu institutga ko‘chib yura olmaysiz. Bitta sharti bor – akadem mobillik. Biz o‘qishni ko‘chirishda bir-ikkita shartlarni ijtimoiy siyosiyatdan kelib chiqib qoldiryapmiz. Birinchi shart – talaba turmushga chiqqan bo‘lsa. Bizda oila insitituti muqaddas. Yigitlar oila bir joyda bo‘lishini xohlaydi. Ikkinchi shart – davlat xizmatchisi bir joydan boshqa hududga ko‘chib o‘tsa. Masalan, viloyatdagi boshqarma boshlig‘i vazir o‘rinbosari bo‘lib boshqa hududga kelsa. Bu yerda ham noto‘g‘ri talqin bo‘ldi. Vazir topshirig‘i bilan ekani aytilgani, oliy ta’lim vazirining xati bilan degani emas. Qaysi vazirlik ishga olib kelgan bo‘lsa, o‘sha tashkilot vaziri: “mana shu mutaxasis bizga kerak. Toshkentga ko‘chib kelyapti, o‘g‘li yoki qizi o‘qiydi”, deb xat bilan chiqishi kerak. Ma’naviy-ma’rifiy nuqtayi nazardan ham biz shuni qilishga majbur bo‘ldik. Talaba bitta dargohga kirib, o‘shani bitirishi va ustozlarning bittasiga moslashishi lozim. Hozir bitta universitetdan 1 ming 500 nafar talaba “perevod” qilib ketyaptida, ikkinchi universitetga 2 ming nafar talaba qo‘shilyapti. Bunda bitta oliy ta’lim muassasasida o‘qituvchilarni ishdan bo‘shatish kerak, narigisida o‘qituvchi izlash kerak. Bunda birinchidan, korrupsiyani oldini olish zarur. Ikkinchidan, balans buzilishining oldini olish muhim. Uchinchidan, ta’limda ozgina qat’iy shartlar bo‘lishi lozim”, – degan vazir.
Abduqodir Toshqulovning qo‘shimcha qilishicha, 2022/2023-o‘quv yilidan boshlab, masofaviy ta’lim shakliga o‘tishga ham ruxsat beriladi.
“Talaba o‘zi tug‘ilib o‘sgan joyidan boshqa hududda o‘qiyotgan bo‘lsa, unga o‘qishini sirtqi yoki masofaviy shaklga o‘tkazishga sharoit yaratib beriladi. Agar hech qayerda turib o‘qishga sharoiti bo‘lmasa, akadem mobillik degan institut joriy qilinadi. Akadem mobillik degani, masalan, Qashqadaryodan bo‘lsangiz. Qashqadaryo muhandislik iqtisodiyot institutida huddi hozir o‘qiyotgan aynan ta’lim yo‘nalishingiz bo‘lsa, siz bir yoki ikki semestr u yoqqa borib o‘qiysiz. Ma’lumotnomani taqdim qilasiz va keyingi o‘quv yilidan o‘zingizning oliy ta’lim muassasangizga kelib o‘qiysiz. Bu nima uchun qilinyapti? Sabab, bizning tarixda ham ajdodlarimiz ilmni yurib o‘rgangan. Hozirgi bolalar Xitoyga, Yevropaga, Rossiyaga borib o‘qiyapti. Ilm olish uchun “komfort zona”dan ozroq chiqish kerak. Talabalar turar joyi bilan ta’minlab qo‘ying, qayerda yashaymiz, degan mazmundagi savollar berilyapti. Lekin talaba o‘qishi uchun ota-onaning ham, davlatning ham, universitet va institutning ham mas’uliyati bor. Shuning uchun ta’limga bunchalik yengil qaramaslik kerak”, – dedi vazirlik rahbari.
Izoh (0)