Ижтимоий тармоқларда ўқишни кўчириш билан боғлиқ янги тартиб муҳокамаларга сабаб бўлди. Олий ва ўрта махсус таълим вазири Абдуқодир Тошқулов мазкур тартиб борасида нотўғри талқин қилинаётган фикрларга муносабат билдирди.
Олий ва ўрта махсус таълим вазирлиги эълон қилган видеода Абдуқодир Тошқулов ўқишни кўчиришдаги қатъий шартларни белгилашнинг асосий сабаблари ҳақида гапирган.
«Нима учун бундай қилинди? Чунки бу борада коррупция ва фирибгарлар кўпайиб кетди. Оддий мисол, талаба келиб, «ҳурматли вазир, бизнинг гуруҳдан 7 киши ўқишини кўчиришга ҳужжат тоширди. Шундан 3 таси ўтди. Мана мен боқувчисини йўқотганман, қолиб кетдим. Ҳаммамиз бир хил йўналишни танлаганмиз. Нега улар ўтди-ю, мен ўтолмадим», деган савол беряпти. Мен бунга доим ҳам жавоб бера оламайман. Бу ерда адолат мезони бузилган. Яъни таниш-билишчилик бўлган, қўнғироқ бўлган ва ҳоказо. Шунинг учун ҳам таълимда рақобат бўлиши учун озгина қатъият, тартиблар бўлиши керак. Мана хорижга борсангиз, масалан, Жанубий Кореяда у институтдан бу институтга кўчиб юра олмайсиз. Битта шарти бор – академ мобиллик. Биз ўқишни кўчиришда бир-иккита шартларни ижтимоий сиёсиятдан келиб чиқиб қолдиряпмиз. Биринчи шарт – талаба турмушга чиққан бўлса. Бизда оила инсититути муқаддас. Йигитлар оила бир жойда бўлишини хоҳлайди. Иккинчи шарт – давлат хизматчиси бир жойдан бошқа ҳудудга кўчиб ўтса. Масалан, вилоятдаги бошқарма бошлиғи вазир ўринбосари бўлиб бошқа ҳудудга келса. Бу ерда ҳам нотўғри талқин бўлди. Вазир топшириғи билан экани айтилгани, олий таълим вазирининг хати билан дегани эмас. Қайси вазирлик ишга олиб келган бўлса, ўша ташкилот вазири: «мана шу мутахасис бизга керак. Тошкентга кўчиб келяпти, ўғли ёки қизи ўқийди», деб хат билан чиқиши керак. Маънавий-маърифий нуқтаи назардан ҳам биз шуни қилишга мажбур бўлдик. Талаба битта даргоҳга кириб, ўшани битириши ва устозларнинг биттасига мослашиши лозим. Ҳозир битта университетдан 1 минг 500 нафар талаба «перевод» қилиб кетяптида, иккинчи университетга 2 минг нафар талаба қўшиляпти. Бунда битта олий таълим муассасасида ўқитувчиларни ишдан бўшатиш керак, наригисида ўқитувчи излаш керак. Бунда биринчидан, коррупцияни олдини олиш зарур. Иккинчидан, баланс бузилишининг олдини олиш муҳим. Учинчидан, таълимда озгина қатъий шартлар бўлиши лозим», – деган вазир.
Абдуқодир Тошқуловнинг қўшимча қилишича, 2022/2023-ўқув йилидан бошлаб, масофавий таълим шаклига ўтишга ҳам рухсат берилади.
«Талаба ўзи туғилиб ўсган жойидан бошқа ҳудудда ўқиётган бўлса, унга ўқишини сиртқи ёки масофавий шаклга ўтказишга шароит яратиб берилади. Агар ҳеч қаерда туриб ўқишга шароити бўлмаса, академ мобиллик деган институт жорий қилинади. Академ мобиллик дегани, масалан, Қашқадарёдан бўлсангиз. Қашқадарё муҳандислик иқтисодиёт институтида ҳудди ҳозир ўқиётган айнан таълим йўналишингиз бўлса, сиз бир ёки икки семестр у ёққа бориб ўқийсиз. Маълумотномани тақдим қиласиз ва кейинги ўқув йилидан ўзингизнинг олий таълим муассасангизга келиб ўқийсиз. Бу нима учун қилиняпти? Сабаб, бизнинг тарихда ҳам аждодларимиз илмни юриб ўрганган. Ҳозирги болалар Хитойга, Европага, Россияга бориб ўқияпти. Илм олиш учун «комфорт зона»дан озроқ чиқиш керак. Талабалар турар жойи билан таъминлаб қўйинг, қаерда яшаймиз, деган мазмундаги саволлар бериляпти. Лекин талаба ўқиши учун ота-онанинг ҳам, давлатнинг ҳам, университет ва институтнинг ҳам масъулияти бор. Шунинг учун таълимга бунчалик енгил қарамаслик керак», – деди вазирлик раҳбари.
Изоҳ (0)