DXX Namangandan Toshkentga ko‘p miqdordagi kuchli ta’sir qiluvchi dori vositalarini olib ketayotgan 33 yashar yigitni qo‘lga oldi

DXX Namangan viloyat boshqarmasi hamda viloyat bojxona boshqarmasi xodimlari tomonidan o‘tkazilgan tezkor tadbirda o‘zi bilan ko‘p miqdorda psixotrop moddalar olib ketayotgan shaxs qo‘lga olindi. Bu haqda “Daryo” muxbiri Azizbek Abduvaliyev xabar bermoqda.

Xodimlar tomonida Pop tumanidagi “Namangan” muntazam yo‘l-patrul xizmati maskanida Namangan—Toshkent yo‘nalishida harakatlanayotgan Nexia rusumli avtomashina to‘xtatilgan.

Avtomashina xolislar ishtirokida ko‘zdan kechirilganda, unda yo‘lovchi sifatida ketayotgan Toshkent shahrida yashovchi, 1989-yilda tug‘ilgan fuqaroning yonida 2237 dona “Regapen”, 400 dona “Selofen” va 300 dona “Tropikamid” kuchli ta’sir qiluvchi dori vositalari borligi aniqlanib, protsessual tartibda rasmiylashtirilib olindi.

Aniqlanishicha, qirg‘istonlik fuqaro tomonidan davlat chegarasidan aylanma yo‘llar orqali viloyatning Uchqo‘rg‘on tumani hududiga o‘tkazib berilgan ushbu dori vositalari Toshkent shahrida sotilishi rejalashtirilgan.

Hozirda ushbu holat yuzasidan jinoyat ishi qo‘zg‘otilib, tergov harakatlari olib borilmoqda.