Yevropa Ittifoqiga a’zo davlatlar blok ichida sotiladigan smartfon va planshetlar uchun yagona standartdagi zaryadlovchi qurilmani joriy etish to‘g‘risidagi qonunni ma’qulladi.
Qonun 2024-yil oxirigacha barcha qurilmalar USB Type-C zaryadlash portiga mos kelishi kerakligini nazarda tutadi.
“Ushbu yangi qonun yevropalik iste’molchilarning hayotini osonlashtiradi va atrof-muhit uchun yaxshi bo‘ladi. Tortmalarimizdagi kabellar uyumiga chek qo‘yish va yiliga 11 ming tonna elektron chiqindini tejash vaqti keldi”, — deydi Bolgariya parlamenti deputati Andrey Kovachev.
Yangi qonun mobil telefonlar, planshetlar, naushnik va garniturlar, portativ o‘yin pristavkalari va portativ dinamiklarni o‘z ichiga olgan kichik va o‘rta o‘lchamdagi portativ elektronika turlariga taalluqli bo‘ladi.
Noutbuklar ham qonunga rioya qilishi kerak, ammo ishlab chiqaruvchilarga qonun kuchga kirganidan keyin tegishli o‘zgartirishlarni joriy qilish uchun 40 oy vaqt beriladi.
Bu qadam mobil qurilmalarining aksariyati uchun Lightning zaryadlovchi qurilmasidan foydalanadigan Apple kompaniyasiga katta zarba bo‘lgani aytilmoqda. Kompaniya Yevroittifoqning qonunini keraksiz, deya e’tiroz bildirgandi.
Qonun Yevropa Ittifoqidagi iste’molchilarning zaryadlovchi qurilmalar xarididan yiliga 250 million yevrogacha tejashi va yiliga 11 ming tonna chiqindini qisqartirishi kutilmoqda.
Yevroittifoq yagona universal USB-C zaryadlovchi qurilmasini rasman 2021-yilning sentabr oyida taklif qilgan edi, uni Yevropa Ittifoqida sotiladigan barcha smartfonlar, planshetlar va naushniklar uchun standart qilish aytilgan. Biroq Apple Yevropa komissiyasining taklifiga qarshi chiqqan.
Izoh (0)