Madridning “Real” klubi yangi chap qanot himoyachisi xarid qilishni rejalashtirmoqda. Bu haqda insayder Nikolo Skira o‘zining ijtimoiy tarmoqlardagi sahifalarida ma’lum qildi.
Manbaga ko‘ra, “qirollik klubi” “Milan” a’zosi Teo Ernandes bo‘yicha rasmiy so‘rov yuborgan. Hozirda 27 yoshli fransiyalik himoyachining “rossonerilar” bilan shartnomasi 2026-yil yozigacha amal qiladi.
Biroq Italiya klubi hamda futbolchi yangi bitib borasida muzokara boshlamagan. Shu sababi Teo joriy mavsum yakunida jamoani tark etishi mumkin. Madrid klubi esa vaziyatdan foydalanib, Ernandesni arzonroqqa qo‘lga kiritishni istamoqda.
Ma’lumot uchun, futbolchi 2017-yildan 2019-yilgacha “Real” futbolchisi bo‘lgan. U klub safida 23 ta uchrashuvda maydonga tushib, 2 assist muallifiga aylangan.
Teo joriy mavsumda barcha musobaqalar doirasidagi 48 ta o‘yinda ishtirok etib, 5 ta gol va 6 ta golli uzatmaga mualliflik qildi. Transfermarkt portaliga ko‘ra, futbolchining hozirgi qiymati 40 million yevroni tashkil etadi.
Avvalroq “Real” “Arsenal”ning markaziy himoyachisi Vilyam Saliba bo‘yicha muzokara boshlagani ma’lum bo‘lgandi.
Shuningdek, “qirollik klubi” “Liverpul” futbolchisi Ibrohim Konateni o‘z safiga qo‘shib olishni istayotgani xabar qilingandi.
Izoh (0)