Европа Иттифоқига аъзо давлатлар блок ичида сотиладиган смартфон ва планшетлар учун ягона стандартдаги зарядловчи қурилмани жорий этиш тўғрисидаги қонунни маъқуллади.
Қонун 2024 йил охиригача барча қурилмалар USB Type-C зарядлаш портига мос келиши кераклигини назарда тутади.
«Ушбу янги қонун европалик истеъмолчиларнинг ҳаётини осонлаштиради ва атроф-муҳит учун яхши бўлади. Тортмаларимиздаги кабеллар уюмига чек қўйиш ва йилига 11 минг тонна электрон чиқиндини тежаш вақти келди», — дейди Болгария парламенти депутати Андрей Ковачев.
Янги қонун мобил телефонлар, планшетлар, наушник ва гарнитурлар, портатив ўйин приставкалари ва портатив динамикларни ўз ичига олган кичик ва ўрта ўлчамдаги портатив электроника турларига тааллуқли бўлади.
Ноутбуклар ҳам қонунга риоя қилиши керак, аммо ишлаб чиқарувчиларга қонун кучга кирганидан кейин тегишли ўзгартиришларни жорий қилиш учун 40 ой вақт берилади.
Бу қадам мобил қурилмаларининг аксарияти учун Lightning зарядловчи қурилмасидан фойдаланадиган Apple компаниясига катта зарба бўлгани айтилмоқда. Компания Евроиттифоқнинг қонунини кераксиз, дея эътироз билдирганди.
Қонун Европа Иттифоқидаги истеъмолчиларнинг зарядловчи қурилмалар харидидан йилига 250 миллион еврогача тежаши ва йилига 11 минг тонна чиқиндини қисқартириши кутилмоқда.
Евроиттифоқ ягона универсал USB-C зарядловчи қурилмасини расман 2021 йилнинг сентябрь ойида таклиф қилган эди, уни Европа Иттифоқида сотиладиган барча смартфонлар, планшетлар ва наушниклар учун стандарт қилиш айтилган. Бироқ Apple Европа комиссиясининг таклифига қарши чиққан.
Изоҳ (0)