Samarqanddagi uylarning birida sodir bo‘lgan gaz portlashi oqibatida vafot etganlar soni 7 kishiga yetdi. Bu haqda “Milliy” telekanalining “Millar” dasturida ma’lum qilindi.
Samarqand shahrining “Bog‘isaroy” MFY, Spitamen ko‘chasida joylashgan uylarning birida gaz portlashi 8-maydan 9-mayga o‘tar kechasi sodir bo‘lgandi. Portlash natijasida hosil bo‘lgan kinetik zarbadan uyning temir-beton konstruksiyalari qulashi oqibatida, 1, 2, 3-qavatlari va yerto‘la qismi zararlangan. Yong‘in sodir bo‘lmagan.
Yong‘in-qutqaruv ekipajlari voqea joyiga yetib borib, baxtsiz hodisa oqibatlarini bartaraf etishga kirishgan. Olib borilgan harakatlar natijasida vayronalar ostidan dastlab 6 nafar fuqaroning jasadi topilgandi. “Millar” dasturida ma’lum qilinishicha, 9-may kuni xonadon vayronalari ostidan yettinchi murda ham olib chiqildi.
Ayni paytda holat yuzasidan dastlabki tergovoldi surishtiruv ishlari olib borilmoqda.
2025-yilning mart oyi oxirlarida Toshkent viloyatining Yangiyo‘l tumanidagi xonadonda gaz portlagandi. Oqibatda er-xotin kuyish tan jarohati olgandi. Shu yilning fevralida Buxoro viloyatining G‘ijduvon tumanidagi uyda gaz portlagandi. Hodisa oqibatida uyning bir qismi qulab tushgan.
Izoh (0)