Joriy yildan boshlab oliy ta’lim muassasalarida magistraturaga qabul imitihonsiz bo‘ladi. Bu haqda Oliy Majlis qonunchilik palatasi yig‘ilishida oliy ta’lim vaziri Abduqodir Toshqulov ma’lum qildi.
Abduqodir Toshqulovning aytishicha, endilikda magistraturaga kirish uchun faqatgina chet tili sertifikati talab etiladi.
“Magistraturaga bu yil faqatgina xalqaro sertifikat olganlargina hujjat topshira oladi. Bir yil oldin bu haqdagi qaror prezidentimiz tomonidan imzolangan. Turli fikrlar bo‘lyapti. Men sizga bir raqamni aytaman: o‘tgan yili 4-bosqich bakalavriat bitiruvchilarining atigi 700 nafari til bo‘yicha sertifikat olgan. Bu yil ularning soni 7 ming nafardan oshdi. Ya’ni 10 barobarga ko‘paydi. Bolalar tilni majbur o‘rganyapti. Til bilmasa, qanday qilib ilmiy tadqiqot olib boradi? Rus tilini haminqadar bilsa, ingliz tilini bilmasa, bugungi zamon talabiga qanday javob beradi? Shuning uchun biz ruxsat oldik. Xalqaro yoki mahalliy sertifikat olgan bola hujjat topshirdimi, mutaxassislikdan imtihon topishirmaydi. Mutaxassislik imtihoni butunlay korrupsiya. Endi diplomdagi o‘rtacha ball hisoblanadi. Bu hujjat topshirgan abituriyent magistr bo‘ladi, degani. To‘lmagan kvota uchun 2-marta qabulni so‘rayapmiz. Avgust va yanvar oylarida magistraturaga qabul bo‘ladi. Hozirgi eng katta muammolarimizdan biri – magistraturaga qabul yaxshi bo‘lmagani hisobiga oliy ta’limda nobop odamlar ko‘payib ketdi. Shu bois biz doim dashnomda yuribmiz. Qabulni to‘liq muvofiqlashtirsa bo‘lar ekan va shu yo‘ldan boryapmiz”, — dedi vazir.
Avvalroq Abduqodir Toshqulov 2026-yilgacha O‘zbekistondagi oliy ta’lim muassasalari soni 200 taga yetkazilishini aytgandi. Shuningdek, vazir 2022/2023 o‘quv yilidan boshlab, o‘qishni ko‘chirishga 2 ta shart bilan ruxsat berilishini ma’lum qilgan.
Izoh (0)