O‘zbekistonning AQSH va Kanadadagi elchisi Javlon Vahobov Kanadaning Britaniya Kolumbiyasi provinsiyasi qishloq xo‘jaligi, oziq-ovqat va baliqchilik vaziri Lana Popham bilan uchrashdi, deb xabar beradi “Dunyo” agentligi. Uchrashuvda tomonlar O‘zbekistondan mavsumiy ishchilarni jalb qilish imkoniyatlarini muhokama qilgan.
Elchi Lana Popxemni O‘zbekiston agrosanoatidagi salohiyat, jumladan, respublikada qishloq xo‘jaligini modernizatsiya qilish borasida amalga oshirilayotgan islohotlar, hududlarning o‘ziga xosligi va iqtisoslashuvini hisobga olgan holda fermerlarni qo‘llab-quvvatlash tizimi bilan tanishtirgan.
Taqdimot chog‘ida 2020—2030-yillarga mo‘ljallangan Qishloq xo‘jaligini rivojlantirish strategiyasi va O‘zbekiston suv xo‘jaligini rivojlantirish konsepsiyasining ustuvor vazifalari hamda mamlakatimiz qishloq xo‘jaligi sohasidagi ehtiyojlarga alohida e’tibor qaratilgan.
Kanada vaziri O‘zbekiston tomonidan aholining oziq-ovqat xavfsizligini ta’minlash borasida ko‘rilayotgan chora-tadbirlarni olqishlagan. Agrosanoat komplekslarini davlat tomonidan qo‘llab-quvvatlashni davom ettirish, qulay ishbilarmonlik muhitini yaratish, sug‘oriladigan yerlarning meliorativ holatini yanada yaxshilash, suv xo‘jaligiga yangi mexanizmlar va raqamli texnologiyalarni joriy etish, shuningdek, yer va suvdan foydalanish samaradorligi ko‘rsatkichlarini oshirish alohida qiziqish uyg‘otgan.
Shuningdek, Kanada tomoni bilan Britaniya Kolumbiyasi provinsiyasiga O‘zbekistondan vaqtinchalik va mavsumiy ishchilarni jalb qilish masalalari ham muhokama qilingan. Qayd etilishicha, Britaniya Kolumbiyasiga har yili 12 mingga yaqin mavsumiy mehnat muhojirlari, asosan, Meksika va Lotin Amerikasining qator mamlakatlaridan provinsiyaning qishloq xo‘jaligi sohasida ishlash uchun 5-6 oy muddatga keladi.
Ma’lum qilinishicha, yaqin kunlarda Kanada vaziri O‘zbekistonning tegishli vazirlik va idoralari vakillari bilan onlayn uchrashuv o‘tkazib, qishloq xo‘jaligi sohasida o‘zaro hamkorlik qilish va O‘zbekistondan Britaniya Kolumbiyasiga mavsumiy ishchilarni jo‘natish istiqbollarini muhokama qiladi.
Eslatib o‘tamiz, 31-may kuni O‘zbekiston tashqi ishlar vaziri vazifasini bajaruvchi Vladimir Norov Kanadaning mamlakatdagi favqulodda va muxtor elchisi (qarorgohi Moskva shahrida) Elison Meri Lekler bilan Toshkent shahrida Kanada viza markazini ochish masalasini o‘rganishga kelishib olgandi.
Izoh (0)