Xalqaro valyuta jamg‘armasi (XVJ) ekspertlari 2022-yilda O‘zbekiston iqtisodiyoti o‘sish sur’ati ilgari prognoz qilingan 6 foizga nisbatan 3-4 foizgacha sekinlashishini kutmoqda. Bu haqda Eureporter ma’lumot berdi.
Jahon banki 2022-yilda O‘zbekistonda yalpi ichki mahsulot o‘sishi 3,6 foizgacha sekinlashishini prognoz qilmoqda.
O‘zbekiston Davlat statistika boshqarmasi ma’lumotlariga ko‘ra, yanvar—mart oylarida YAIM o‘tgan yilning mos davriga nisbatan 5,8 foizga oshgan.
XVJ O‘zbekiston iqtisodiyotiga asosiy hamkorlar iqtisodining sekinlashuvi salbiy ta’sir ko‘rsatishi mumkinligini qayd etadi. Vaziyat bir yil ichida qanday yomonlashishi mumkinligi hozircha aniq emas.
Qirg‘izistonda iqtisodiyot 2021-yilning shu davridagi 9 foizga pasayish bilan solishtirganda 4,4 foizga o‘sdi.
Qozog‘istonda ham iqtisodiy o‘sish 2021-yilning shu davridagi 1,4 foiz pasayish bilan solishtirganda 4,4 foizni tashkil etdi.
Xitoy yalpi ichki mahsuloti 1-chorakda 4,8 foizga o‘sdi va 4-chorakka nisbatan 1,3 foiz tezlashdi.
XVJ ekspertlari O‘zbekistonda joriy operatsiyalar taqchilligi yalpi ichki mahsulotga nisbatan 9,5 foizgacha oshishini bashorat qilmoqda.
Eksport hajmi 2,4 barobar oshib, 5,8 mlrd dollarni tashkil etdi, oltinni hisobga olmaganda eksport hajmi 16 foizga o‘sdi, nooziq-ovqat xomashyo eksporti esa 22 foizga qisqardi, 1-chorakda import 45 foizga o‘sib, 7,4 mlrd dollarni tashkil etdi.
XVJ ekspertlari 2022-yilda jahon oziq-ovqat va yoqilg‘i narxlarining keskin ko‘tarilishi tufayli O‘zbekistonda yillik inflyatsiya 12 foizni tashkil etishini prognoz qilmoqda.
Iqtisodiy o‘sishni qo‘llab-quvvatlash
Banklar tomonidan tadbirkorlarga, oziq-ovqat va xalq iste’mol tovarlari ishlab chiqaruvchilarga xomashyo va aylanma mablag‘lar xarid qilish uchun qo‘shimcha 10 trln so‘m “aylanma” kreditlar ajratiladi.Meva-sabzavotchilik (2022-yilda 2 trln so‘m), oilaviy tadbirkorlik (10 trln so‘m), ipoteka (13 trln so‘m) va ta’lim (1 trln so‘m) davlat dasturlari bo‘yicha kreditlar hajmi va imtiyozli stavkalari saqlanib qoldi.
Hududlardagi kichik va o‘rta biznes loyihalarini moliyalashtirishga 300 mln dollar yo‘naltirilmoqda. Ushbu mablag‘lar milliy valyutada 10 foiz stavkada 7 yil muddatga banklarda joylashtiriladi. Shu bilan birga, tadbirkorlarga beriladigan kredit stavkasi 14 foizdan oshmaydi.
Shuningdek, prezident qaroriga muvofiq, 2023-yil 1-aprelga qadar yuqori qo‘shimcha qiymatli tovarlarni eksport qiluvchi mahalliy korxonalarga eksport uchun transport xarajatlarini qoplash uchun subsidiyalar ajratiladi: yaqin xorijga transport xarajatlarining 50 foizigacha, Yevropa Ittifoqi mamlakatlariga esa 70 foizgacha.
Avvalroq Jahon banki O‘zbekiston yalpi ichki mahsuloti 2022-yilda 4,3 foizga o‘sishini prognoz qilgandi.
Izoh (0)