Samarqand viloyati Nurobod tumanida qurilish kompaniyasi fuqarolarning ombudsmanga murojaatidan so‘ng yetkazilgan zararni qoplab berdi. Bu haqda Oliy Majlisning Inson huquqlari bo‘yicha vakil axborot xizmati xabar berdi.
2022-yilning 18-may kuni Oliy Majlisning Inson huquqlari bo‘yicha vakilning (ombudsmanning) Samarqand viloyatidagi mintaqaviy vakili Diyor Xusanovga Nurobod tumani, “Navro‘z” MFYdagi ko‘p qavatli uyda yashovchi 3 nafar fuqaro R.S., Ya.N. va A.S. murojaat qilgan.
Ular o‘z murojaatida “Navro‘z” MFYda joylashgan murojaatda ko‘rsatilgan ko‘p qavatli uy 2021-yil dekabr oyida qurilib foydalanishga topshirilganiga qaramay, qisqa vaqt ichida xonadonlarning devor, hammom va oshxona qismlari yaroqsiz holatga kelib qolganini bildirgan.
Ombudsmanning Samarqanddagi mintaqaviy vakili murojaatni joyiga chiqib o‘rganganida, haqiqatdan fuqarolarning e’tirozlari o‘rinli ekaniga guvoh bo‘lgan.
Vakil ushbu murojaat bo‘yicha buyurtmachi “Qishloq qurilish invest” injiniring kompaniyasiga tegishli tartibda xat yuborib, unda bajarilgan sifatsiz qurilish ishlarni darxol tartibga keltirish aks holda Ombudsman tomonidan fuqarolar manfaatini ko‘zlab sudga moddiy va ma’naviy zarar undirish bo‘yicha da’vo ariza kiritilishini qayd etgan.
Shundan so‘ng, buyurtmachi “Qishloq qurilish invest” injiniring kompaniyasi xodimlari murojaatni joyiga chiqib o‘rganib, obyektdagi mavjud kamchiliklarni bartaraf qilgan va fuqarolarga yetkazilgan zararlarni ham qoplab bergan.
Avvalroq monopol korxonalarning 3,6 mlrd so‘mdan ortiq asossiz daromadi iste’molchilar foydasiga qayta hisob qilingani, Toshkentda Spark’ning bo‘yoqlari sifatsiz chiqqani bois yangisiga almashtirib berilgani to‘g‘risida xabar berilgandi.
Izoh (0)