“Iyun oyida birja savdolariga 170 ming tonna un mahsulotlari qo‘yilishi kutilmoqda” — O‘zbekiston tovar-xomashyo birjasi rasmiysi

Un va g‘alla mahsulotlarini ochiq birja savdolarida sotish uchun yaratilgan sharoitlar bilan yaqindan tanishtirish maqsadida 7-iyun kuni O‘zbekiston tovar-xomashyo birjasiga press-tur tashkil etildi. Tadbir avvalida tashkilot rahbariyati va soha mutaxassislari ishtirokida matbuot anjumani o‘tkazildi. Bu haqda “Daryo” muxbiri xabar bermoqda.

Qayd etilishicha, un mahsulotlarining birja orqali sotilishi ushbu mahsulotlar uchun haqiqiy bozor narxlarining shakllanishi, ularning harakatlanishi va soliq tushumlarining shaffofligini ta’minlaydi.

“Iyun oyiga qadar iste’mol uchun chiqarilgan unning oylik hajmi 140 ming tonnani tashkil etgan bo‘lsa, iyun oyida birja savdolariga 170 ming tonna un mahsulotlari qo‘yilishi kutilmoqda.

Bundan tashqari, 2020-yilda o‘tkazilgan birja savdolariga o‘rtacha 6,9 ming tonna un mahsulotlari qo‘yilgan bo‘lsa, bugungi kunda ushbu ko‘rsatkich 10 ming tonnani tashkil qilmoqda. Ya’ni mamlakatimizda un zaxiralari yetarli bo‘lganligi sababli birja savdolariga ko‘proq miqdorda un chiqarilmoqda va un bozorlarida taklif darajasi oshmoqda”, — deydi O‘zbekiston tovar-xomashyo birjasi bosh makleri Islombek Ibragimov.

Uning ta’kidlashicha, 1—6-iyun kunlari O‘zbekiston tovar-xomashyo birjasida 1-navli un bo‘yicha dastlabki birja savdolari o‘tkazilgan. Bozorni un mahsuloti bilan tezkor to‘ldirish maqsadida 4-iyun, shanba kunida ham qo‘shimcha birja savdolari bo‘lib o‘tgan.

“O‘tgan besh kun ichida “O‘zdonmahsulot” AJ tarkibidagi 44 ta korxonalar tomonidan birja savdolariga 45,0 ming tonna 1-navli un qo‘yildi va ulardan 43,8 ming tonnasi, ya’ni 97% sotildi. Birja savdolarida sotilmagan qoldiq un hajmi 1,2 ming tonnadan iborat.

O‘tkazilgan birja savdo natijalariga ko‘ra, 1-navli unning o‘rtacha narxi mahsulotning bir tonnasi uchun 4 549,3 ming so‘mni tashkil qildi. Bunda erkin un bozori yangi sharoitlarda o‘zining barqaror muvozanatini izlamoqda. Unning ochiq birja savdolariga o‘tkazilishi, un hajmlari va bozordagi taklif darajasini oshishi natijasida ayni paytda unning bir qopi birjadan tashqari bozorlarda o‘rtacha 240-260 ming so‘m atrofida sotilmoqda.

Shu bilan birga, unni hududlar kesimida xarid qilish qamrovi birjada xaridorlar sonining ko‘payishi hisobiga kengayib bormoqda. Xususan o‘tkazilgan birja savdolarida ishtirok etgan xaridorlarning soni 2 ming 822 nafardan 4 ming 518 nafargacha ko‘paygan”, — deydi O‘zbekiston tovar-xomashyo birjasi rasmiysi.