Беларусь Россия ва Евроиттифоқ мамлакатлари ўртасидаги алоқаларнинг бузилишидан фойда кўрган асосий мамлакатлардан бирига айланди, деб ёзади Meduza. Апрелда мамлакатга Беларусь экспорти 100 фоиздан кўпроқ ошиб қарийб 1,5 миллиард долларни ташкил этди. Бу ҳақда Bloomberg халқаро савдо-сотиқ ҳақидаги маълумотлар бўйича ўз таҳлилига асосланиб хабар берди.
Таққослаш учун, Германиянинг Россияга экспорти апрелда тахминан 800 миллион долларгача қисқарди. Шу тариқа, Беларусь Россияга товарлар етказиб бериш бўйича биринчи марта Германияни ортда қолдирди (унинг иқтисодиёти Беларусникидан 60 марта каттароқ).
Россияга хорижий импортнинг барчаси апрель ҳолатига 2021 йил апрели ва 2022 йил февралига нисбатан тахминан 60-80 фоизга пасайди, деб ёзади Bloomberg «Откритие» банки маълумотларига таяниб. Ушбу маълумотларга кўра, импорт ҳажми ушбу даврда 27 миллиард доллардан 5-10 миллиард долларгача тушиб кетган бўлиши мумкин.
Bloomberg ҳисоб-китобларига кўра, Россияга 2021 йилда импортнинг деярли ярми улушига тўғри келган мамлакатлардан етказиб беришлар апрель ойида ўтган йилнинг шу даврига нисбатан тахминан 40 фоизга пасайган. Бу Россияга қарши санкциялар киритмаган Хитойдан товар етказиб беришга ҳам тааллуқли.
«Бозор деярли қулади [шу баҳорда]. Бугунги кунда Европадан юк келтириш жуда қийин, баъзида эса деярли имконсиз», — дея агентликка маълум қилди СДЭК етказиб бериш хизмати халқаро логистика бўлими бошлиғи Андрей Побежимов.
«Россия импорт ва экспорт бўйича батафсил маълумотлар каби баъзи асосий статистик кўрсаткичларни эълон қилишни тўхтатиб қўйган, шу сабабли унинг иқтисодиёти ҳақида аниқ маълумотларни олиш қийинлашган», — дейилади хабарда.
Изоҳ (0)