20-iyundan boshlab 1990-yillar boshida to‘xtatib qo‘yilgan Dushanbe—Toshkent yo‘nalishi bo‘yicha yo‘lovchi poyezdlari harakati qayta tiklanadi, deb xabar beradi “Dunyo” agentligi.
Tojikistonning “Xovar” milliy axborot agentligi ma’lumotlariga ko‘ra, bu haqda 2-iyun kuni Toshkentda o‘tkazilgan O‘zbekiston va Tojikiston prezidentlarining qo‘shma brifingida ma’lum qilingan.
“Tomonlar yangi tranzit koridorlarni shakllantirishga va zamonaviy logistik infratuzilmani yaratishga, avia, temiryo‘l va avtobus tashvularini rivojlantirishga, hamkorlikda agroklasterlar va zamonaviy ishlab chiqarishlarni yo‘lga qo‘yishga, meva-sabzavot mahsulotlarini qayta ishlashni tashkil etish va uchinchi davlatlar bozorlariga birgalikda chiqishga kelishib oldi”, — deb yozadi “Xovar” agentligi.
“Tojikiston temir yo‘llari” kompaniyasining ma’lum qilishicha, xalqaro yo‘lovchi poyezdi Dushanbe—Quduqli—Sariosiyo—Qumqo‘rg‘on—Darband—Dehqonobod—Qarshi—Samarqand—Jizzax—Guliston—Toshkent yo‘nalishi bo‘yicha haftasiga bir marta harakatni amalga oshiradi. Dushanbedan Toshkentgacha bo‘lgan masofa 916 kilometrni tashkil etadi, harakat davomiyligi — 21 soat. Poyezdlar tarkibi tojikistonlik temiryo‘lchilar tomonidan shakllantiriladi. Taxminlarga ko‘ra, poyezd 10 ta vagondan iborat bo‘ladi: 1 ta yotoq vagoni, 4 ta kupe, vagon-restoran va 4 ta plaskart vagon.
Eslatib o‘tamiz, 2021-yilning oktabrida Toshkent–Xo‘jand–Toshkent xalqaro avtobus yo‘nalishida muntazam qatnovlar qayta tiklangandi. 2022-yilning aprelida esa O‘zbekiston va Tojikiston o‘rtasidagi qator avtobus qatnovlari tajriba-sinov tariqasida tiklangan.
Izoh (0)