20 июндан бошлаб 1990 йиллар бошида тўхтатиб қўйилган Душанбе—Тошкент йўналиши бўйича йўловчи поездлари ҳаракати қайта тикланади, деб хабар беради «Дунё» агентлиги.
Тожикистоннинг «Ховар» миллий ахборот агентлиги маълумотларига кўра, бу ҳақда 2 июнь куни Тошкентда ўтказилган Ўзбекистон ва Тожикистон президентларининг қўшма брифингида маълум қилинган.
«Томонлар янги транзит коридорларни шакллантиришга ва замонавий логистик инфратузилмани яратишга, авиа, темир йўл ва автобус ташвуларини ривожлантиришга, ҳамкорликда агрокластерлар ва замонавий ишлаб чиқаришларни йўлга қўйишга, мева-сабзавот маҳсулотларини қайта ишлашни ташкил этиш ва учинчи давлатлар бозорларига биргаликда чиқишга келишиб олди», — деб ёзади «Ховар» агентлиги.
«Тожикистон темир йўллари» компаниясининг маълум қилишича, халқаро йўловчи поезди Душанбе—Қудуқли—Сариосиё—Қумқўрғон—Дарбанд—Деҳқонобод—Қарши—Самарқанд—Жиззах—Гулистон—Тошкент йўналиши бўйича ҳафтасига бир марта ҳаракатни амалга оширади. Душанбедан Тошкентгача бўлган масофа 916 километрни ташкил этади, ҳаракат давомийлиги — 21 соат. Поездлар таркиби тожикистонлик темир йўлчилар томонидан шакллантирилади. Тахминларга кўра, поезд 10 та вагондан иборат бўлади: 1 та ётоқ вагони, 4 та купе, вагон-ресторан ва 4 та пласкарт вагон.
Эслатиб ўтамиз, 2021 йилнинг октябрида Тошкент–Хўжанд–Тошкент халқаро автобус йўналишида мунтазам қатновлар қайта тикланганди. 2022 йилнинг апрелида эса Ўзбекистон ва Тожикистон ўртасидаги қатор автобус қатновлари тажриба-синов тариқасида тикланган.
Изоҳ (0)