Ун ва ғалла маҳсулотларини очиқ биржа савдоларида сотиш учун яратилган шароитлар билан яқиндан таништириш мақсадида 7 июнь куни Ўзбекистон товар-хом ашё биржасига пресс-тур ташкил этилди. Тадбир аввалида ташкилот раҳбарияти ва соҳа мутахассислари иштирокида матбуот анжумани ўтказилди. Бу ҳақда «Дарё» мухбири хабар бермоқда.
Таъкидланишича, давлат раҳбарининг «Ғаллани етиштириш ва сотишда бозор тамойилини жорий этишнинг қўшимча чора-тадбирлари тўғрисида»ги қарорига асосан, ун маҳсулотлари 2022 йил 1 июндан, ғалла маҳсулотлари эса 1 июлдан бошлаб очиқ биржа савдоларига қўйилиши белгиланган.
«Ғаллачиликда бозор механизмлари жорий этилишидан кўзланган асосий мақсад: буғдой ва ун маҳсулотлари учун нархларнинг барқарорлигини таъминлашдан иборат. Ўз навбатида маҳсулотлар учун нархлар барқарорлигига эришишнинг энг самарали усули бу талаб ва таклиф мутаносиблигини таъминлаш ҳисобланади. Шаффоф биржа савдолари эса мана шундай имкониятларни тақдим этади.
Мазкур вазифаларни ижро этиш доирасида Ўзбекистон товар-хом ашё биржасида зарур шарт-шароитлар яратилган. Хусусан, буғдой маҳсулотларини биржа орқали сотишда фермерлар белгиланган биржа комиссион тўловлари ва гаров маблағларини киритишдан озод этилади.
Буғдойнинг биржа орқали туманларда самарали сотилишини йўлга қўйиш мақсадида 20 мингдан зиёд фермерлар ўқитилди. Шунингдек, улар биржада электрон рақамли имзо орқали соддалаштирилган тартибда рўйхатдан ўтказилиб, брокерлик идораларига бириктирилди», — деди Ўзбекистон товар-хом ашё биржаси бош маклери Исломбек Ибрагимов.
Унинг қайд этишича, Ўзбекистон товар-хом ашё биржасида фаолият юритаётган брокерлар сонини кўпайтириш мақсадида биржа мутахассислари томонидан Савдо-саноат палатасининг қарийб 200 нафар ходимлари ва фермерларнинг 500 дан зиёд ҳисобчилари брокерликка ўқитилган ва биржада брокер сифатида рўйхатдан ўтказилган.
Изоҳ (0)