Украина ва Россия урушда ҳалок бўлган ҳарбий хизматчиларнинг жасадларини бир-бирига топширди. Бу ҳақда Украинанинг оккупация қилинган ҳудудлар реинтеграцияси вазирлиги баёнотига таяниб, «Громадске» хабар берди.
«Алоҳида вазиятларда бедарак йўқолганлар ишлари бўйича вакил иштирокидаги музокаралар натижасида 160 га 160 формуласига асосан жасадларни алмашиш бўйича келишувга эришилди», — дейилади Реинтеграция вазирлиги хабарида.
Айирбошлаш 2 июнь куни Запорожье вилоятидаги фронт чизиғида бўлиб ўтган. Операция Украина Мудофаа вазирлигининг Бош разведка бошқармаси, Украина хавфсизлик хизмати, Украина Қуролли кучлари Бош штаби ва бошқа ҳуқуқ-тартибот идоралари иштирокида ўтказилган.
Реинтеграция вазирлигининг баёноти қурбонларнинг жасадини алмашиш тўғрисидаги илк расмий хабардир. Аввал Украина вакиллари ҳам, Россия вакиллари ҳам ҳалок бўлган ҳарбийларнинг жасадларини топширишга тайёр эканини, бироқ алмашиш бўйича келиша олмаганини айтганди.
Россия томони жасадларнинг алмашинуви борасида ҳозирча изоҳ бермаган.
Россия ва Украина ўз қуролли кучларининг йўқотишлари ҳақида мунтазам равишда маълумот бермаяпти. Украина президенти Владимир Зеленский 1 июнь куни Американинг Newsmax нашрига берган интервьюсида Украина шарқдаги жангларда ҳар куни 60—100 аскарини йўқотаётгани ва яна 500 нафари ярадор бўлаётганини айтганди. BBC рус хизматининг 30 май кунги хабарига кўра, очиқ манбаларда Украинада ҳалок бўлган камида 3052 нафар россиялик аскар ва зобитларнинг исмлари маълум қилинган.
Изоҳ (0)