Toshkent shahrida 1—2-iyun kunlari “O‘zbekiston rivojlanish yo‘lida: qishloq xo‘jaligi va oziq-ovqat tadqiqotlarini transformatsiya qilish” mavzusida forum bo‘lib o‘tdi. Unda Yevropa Ittifoqining O‘zbekistondagi elchisi Sharlotta Adrian ham ishtirok etib, qishloq xo‘jaligi va oziq-ovqat sohasida hamkorlikda olib borilayotgan ishlar xususida so‘z yuritdi. Bu haqda “Daryo” muxbiri xabar bermoqda.
“Bu yo‘nalishda turli manfaatdor tomonlarni jalb qilgan holda, olimlar, mutaxassislar ishtirokida tadqiqotlar, ilmiy izlanishlar olib boryapmiz, innovatsion yondashuvlarni tatbiq etyapmiz. Maqsadimiz O‘zbekiston qishloq xo‘jaligi va oziq-ovqat xavfsizligi sanoati barqaror, iqlim o‘zgarishlari va boshqa omillarga bardoshli bo‘lishini ta’minlash.
Bu boradagi loyihalarni imkon qadar ilmiy asoslarga tayanib, ekologik jihatdan vaziyatni izdan chiqarmagan va tabiatga zarar yetkazmagan holatda amalga oshirishni ilgari suramiz.
Mazkur yo‘nalishda olib borayotgan ishlar doirasida Qishloq xo‘jaligi vazirligi huzurida Oziq-ovqat va qishloq xo‘jaligi sohasida strategik rivojlanish va tadqiqotlar xalqaro markazi (ISCAD) tashkil etildi. Shuningdek, qishloq xo‘jaligida bilim va innovatsiyalar milliy markazi (AKIS) ham faoliyat boshladi. Ushbu markazlar mavjud muammolarni aniqlash va bartaraf etishda faol bo‘lishni maqsad qilgan.
Shu o‘rinda, mamlakat qishloq xo‘jaligi sohasida bir qancha muammolar borligini ham aytib o‘tmoqchiman. O‘zbekistonda ushbu yo‘nalishdagi xatti-harakatlar tarqoqlik shaklda rivojlanmoqda. Shuningdek, qishloq xo‘jaligi sohasi bilan ilmiy tadqiqotlar o‘rtasidagi bog‘liqlik juda zaif.
Bugungi forum shu kabi muammolarga yechim topish, mutaxassislar va mas’ul tashkilotlar bilan hamkorlikda harakat qilish va aniq dasturlar ishlab chiqish maqsadida o‘tkazilmoqda. Yevropa Ittifoqi bu yo‘nalishdagi tadqiqotlar, barcha tashabbuslarga jiddiy mablag‘larni yo‘naltiradi va hamisha qo‘llab-quvvatlaydi”, — deydi Sharlotta Adrian.
Izoh (0)