Samarqandda yo‘ldan o‘tayotgan 4 yoshli qizcha Nexia-3 urib yuborishidan vafot etdi

Samarqand viloyatining Oqdaryo tumanida 4 yoshli qizni Nexia-3 urib ketishidan vafot etdi.

Viloyat IIB axborot xizmati xabariga ko‘ra, voqea 31-may kuni sodir bo‘lgan. 15 yoshli qiz 4 yoshli singlisi bilan “Kumushkent” mahallasi hududidagi piyodalar o‘tish joyidan yo‘lni kesib o‘tayotgan bo‘lgan. Nexia-3 piyodalarga yo‘l bermasdan harakatni davom ettirgan. Opasi singlisining qo‘lidan ushlab qolishga ulgurmagan. Qizcha yugurganicha o‘tib ketaman deb o‘ylagan, biroq katta tezlikda kelayotgan mashina qizchani urib ketgan.

U og‘ir tan jarohatlari bilan tuman tibbiyot birlashmasiga yotqizilgan va shu yerda vafot etgan. Haydovchi qizlarni shu yerda qoldirib, o‘zi ketib qolgan.

Samarqand viloyati IIB YHXB xodimlarining tezkor qidiruv-surishtiruv ishlari natijasida ushbu YTHni sodir etgan etgan haydovchi topilgan. Hozirda u bilan tergov harakatlari olib borilmoqda.

“O‘zimni umuman yo‘qotib qo‘ydim. Qo‘rqqanimdan mashinaga o‘tirdim-da, haydab ketdim”, — deydi 27 yoshli haydovchi.

Bundan avval Samarqandda otasiga tegishli Lacetti’ni boshqargan 8-sinf o‘quvchisi ikki kishini urib yuborgani, ulardan biri vafot etgani haqida xabar berilgan edi.