Тошкент шаҳрида 1—2 июнь кунлари «Ўзбекистон ривожланиш йўлида: қишлоқ хўжалиги ва озиқ-овқат тадқиқотларини трансформация қилиш» мавзусида форум бўлиб ўтди. Унда Европа Иттифоқининг Ўзбекистондаги элчиси Шарлотта Адриан ҳам иштирок этиб, қишлоқ хўжалиги ва озиқ-овқат соҳасида ҳамкорликда олиб борилаётган ишлар хусусида сўз юритди. Бу ҳақда «Дарё» мухбири хабар бермоқда.
«Бу йўналишда турли манфаатдор томонларни жалб қилган ҳолда, олимлар, мутахассислар иштирокида тадқиқотлар, илмий изланишлар олиб боряпмиз, инновацион ёндашувларни татбиқ этяпмиз. Мақсадимиз Ўзбекистон қишлоқ хўжалиги ва озиқ-овқат хавфсизлиги саноати барқарор, иқлим ўзгаришлари ва бошқа омилларга бардошли бўлишини таъминлаш.
Бу борадаги лойиҳаларни имкон қадар илмий асосларга таяниб, экологик жиҳатдан вазиятни издан чиқармаган ва табиатга зарар етказмаган ҳолатда амалга оширишни илгари сурамиз.
Мазкур йўналишда олиб бораётган ишлар доирасида Қишлоқ хўжалиги вазирлиги ҳузурида Озиқ-овқат ва қишлоқ хўжалиги соҳасида стратегик ривожланиш ва тадқиқотлар халқаро маркази (ISCAD) ташкил этилди. Шунингдек, қишлоқ хўжалигида билим ва инновациялар миллий маркази (AKIS) ҳам фаолият бошлади. Ушбу марказлар мавжуд муаммоларни аниқлаш ва бартараф этишда фаол бўлишни мақсад қилган.
Шу ўринда, мамлакат қишлоқ хўжалиги соҳасида бир қанча муаммолар борлигини ҳам айтиб ўтмоқчиман. Ўзбекистонда ушбу йўналишдаги хатти-ҳаракатлар тарқоқлик шаклда ривожланмоқда. Шунингдек, қишлоқ хўжалиги соҳаси билан илмий тадқиқотлар ўртасидаги боғлиқлик жуда заиф.
Бугунги форум шу каби муаммоларга ечим топиш, мутахассислар ва масъул ташкилотлар билан ҳамкорликда ҳаракат қилиш ва аниқ дастурлар ишлаб чиқиш мақсадида ўтказилмоқда. Европа Иттифоқи бу йўналишдаги тадқиқотлар, барча ташаббусларга жиддий маблағларни йўналтиради ва ҳамиша қўллаб-қувватлайди», — дейди Шарлотта Адриан.
Изоҳ (0)